Қоршаған ортаның тазалығы мен табиғи байлықтарды сақтау әр азаматтың күнделікті дағдысына айналғанда ғана экологиялық мәдениет қалыптасады. Осы мақсатта еліміз бойынша жүзеге асырылып жатқан «Таза Қазақстан» жалпыұлттық экологиялық акциясы аясында Қаратал өзенінің жағалауында «Таза жағалау» акциясы ұйымдас-тырылды.
Қазақстан Республикасы Экология және табиғи ресурстар министрлігінің тапсырмасына сәйкес өткен тазалық шарасына Қаратал ауданының тұрғындары өзен жағалауын тұрмыстық қалдықтардан тазартуға атсалысты. Сенбілік барысында табиғат аясында шашылып жатқан қоқыстар жиналып, жағалау аумағы ретке келтірілді.
Тазалық жұмыстарына 300 адам жұмылып, нәтижесінде 7 тоннаға жуық қоқыс шығарылды. Ауқымды жұмыстарды атқаруға 4 арнайы техника жұмылдырылды. Бірнеше сағатқа созылған сенбілік барысында қатысушылар өзен жағалауын тазалап қана қоймай, табиғатты аялаудың маңызын тағы бір мәрте көрсетті.
Сенбілікке аудан тұрғындарының белсенді қатысуы да көпшілік арасында экологиялық жауапкершіліктің артып келе жатқанын аңғартады. Өйткені табиғатты қорғау тек арнайы акциялар кезінде ғана атқарылатын жұмыс емес. Ол күнделікті өмір салты болуы тиіс. Қоқысты белгіленген орынға тастау, табиғи аумақтарды ластамау, жасыл желекті қорғау секілді қарапайым әрекеттердің өзі қоршаған ортаны сақтауға қосылған үлкен үлес.
Медет ЖҰМАБАЙ
