Қазақстан мен Қытай арасындағы ғылыми-техникалық саладағы ынтымақтастық жаңа деңгейге көтеріліп, екі елдің ғалымдары ортақ зерттеулерді жүзеге асыруды қолға алды, – деп хабарлайды 7-su.kz ақпараттық порталы.
ҚР Ғылым және жоғары білім министрінің м.а. Саясат Нұрбек Қытайдың ғылым және техника қауымдастығының (CAST – China Association for Science and Technology) атқарушы президенті Цзюнькэ Хэ бастаған делегациямен ресми кездесу өткізді. Мәртебелі меймандар қатарында ҚХР-дың Қазақстан Республикасындағы Төтенше және Өкілетті Елшісі Хань Чуньлинь, сондай-ақ Қытайдың белгілі ғылыми орталықтары мен провинцияларының өкілдері болды. Бұл басқосу Орталық Азия өңірінде білім мен инновацияны дамытудың айқын қадамына айналды.
Кездесу барысында Саясат Нұрбек отандық жоғары білім беру мен ғылым жүйесін жаңғыртуға бағытталған негізгі реформаларды таныстырды. Еліміздің басты мақсаты – халықаралық білім беру және ғылыми ынтымақтастықты кеңейтуге мүмкіндік беретін ауқымды білім беру орталығын қалыптастыру. Бұл бастама өңірлік ғалымдардың әлеуетін арттырып, озық технологияларды өндіріске енгізуге жол ашады.
Өз кезегінде Цзюнькэ Хэ мырза 250-ден астам халықаралық ғылыми-техникалық ұйымның мүшесі саналатын CAST қауымдастығының ауқымды жобаларын баяндады. Екі тарап ендігі жерде академиялық алмасуды жандандырып, ғылыми-гуманитарлық байланыстарды жаңа белеске көтеруге уағдаласты. Атап айтқанда, ғылымды танымал ету, білім сапасын жақсарту және халықтың цифрлық әрі ғылыми сауаттылығын көтеру мәселелері жан-жақты талқыланды.
Сондай-ақ Саясат Нұрбек өзара ғылыми тағылымдамалар ұйымдастыру, жасанды интеллект мүмкіндіктерін пайдалану, ғылыми нәтижелерді коммерцияландыру және инженерия саласында білікті кадрлар даярлауды ұсынды. Екі ел арасындағы серіктестікті кеңейту үшін 300-400 жас маманды тағылымдамадан өткізіп, бірлескен жобаларға 2-3 млн доллар көлемінде гранттар тарту жоспарланған.
