Қазақстанда жаңа технологиялар мен жасанды интеллектінің белсенді дамуы еңбек нарығын түбегейлі өзгертіп жатыр, – деп хабарлайды 7-su.kz ақпараттық порталы.
Өңірдегі және елдегі еңбек нарығындағы соңғы өзгерістер туралы Үкімет отырысында Еңбек және халықты әлеуметтік қорғау министрі Асқарбек Ертаев толығырақ айтып берді. Мемлекеттік орган басшысы қай мамандықтардың тарих қойнауына кететінін және жақын жылдары қай сала мамандарына сұраныс жоғары болатынын ашық айтты.
Ресми мәліметтер бойынша, бүгінде еліміздегі жұмыс күшінің жалпы саны 9,8 млн адамды құрайды. Олардың ішінде 9,4 млн азамат тұрақты жұмыспен қамтылған, ал жұмыспен қамту деңгейі 96%-ға жетті. Дегенмен, сандық көрсеткіштер жоғары болғанымен, нарықта білікті жұмысшы кадрларға тапшылық әлі де байқалады.
Электрондық еңбек биржасына жарияланған бос орындардың жартысынан астамы жұмысшы мамандарға тиесілі. Ендігі басты міндет – сұранысты жасанды түрде жасау емес, кадр даярлау ісін экономиканың ағымдағы әрі перспективалық қажеттіліктеріне бейімдеу.
Технологиялар мен цифрлық жүйелердің жедел дамуы салдарынан кейбір мамандардың еңбегін енді бағдарламалар мен алгоритмдер атқарады. Министрдің сөзінше, мынадай бағыттар біртіндеп нарықтан ығыстырылады:
-
Мәтінді өңдеушілер мен терушілер;
-
Деректерді енгізу жөніндегі мамандар (операторлар);
-
Корректорлар.
Дегенмен, басқа да көптеген кәсіптер мүлдем жойылып кетпей, трансформациядан өтеді. Яғни, мамандар жаңа цифрлық құралдарды меңгеріп, жұмыс істеу дағдыларын жаңартуы қажет.
Алмастыру мен жаңа сұраныстарды есептегенде, 2035 жылға дейін Қазақстан экономикасына 2,9 млн маман қажет болады. Оның ішінде 1,8 млн адам – техникалық және жұмысшы мамандық өкілдері.
Ең жоғары сұраныс мына салаларда қалыптасады:
-
Өнеркәсіп және өңдеу өндірісі;
-
Құрылыс саласы;
-
Ауыл шаруашылығы;
-
IT, биотехнология, жасыл және ядролық энергетика.
Елімізде сұранысқа ие кәсіптер тізбесі 51-ден 174-ке дейін кеңейді. Қазақстан халқы мен жастар санының артуы техникалық және кәсіптік білім беру жүйесін жаңғыртуды талап етеді. Сондықтан жаңа заман талабына сай оқу бағдарламалары жедел жаңартылып жатыр.
