Талдықорғанда мемлекеттік тілдің бүгінгі ахуалы мен болашағына қатысты маңызды мәселелер талқыланған республикалық ғылыми-практикалық конференция өтті. «Мемлекеттік тіл және тілдік тұлғаны қалыптастыру моделі: тарих, инновация, әдістеме» тақырыбындағы басқосуды облыстық ішкі саясат басқармасы мен «Тіл» оқу-әдістемелік орталығы ұйымдастырды.
Конференция тізгінін «Тіл» оқу-әдістемелік орталығының басшысы Жеңіс Жолдыбаев ұстап, қатысушыларға ізгі тілегін білдірді. Қонақтарға сөз кезегін берді.
Жиынның ашылуында Жетісу облыстық ішкі саясат басқармасы басшысының орынбасары Ермек Ақшабаев сөз сөйлеп, конференция жұмысына сәттілік тіледі.
– Құрметті конференция қатысушылары, қадірлі тіл жанашырлары. Бүгінгі басқосу мемлекеттік тілдің қоғамдағы орны мен қолданыс аясын кеңейту мәселелерін жаңа қырынан қарастыруға мүмкіндік беріп отыр. Мемлекеттік тіл – халқымыздың тарихи жадын, рухани болмысын және елдік тұтастығын сабақтастыратын аса маңызды құндылық. Конференция жұмысына қатысып отырған баршаңызға алғыс айтамын. Жетісу жеріндегі бүгінгі ғылыми басқосу мазмұнды пікірлерге, жаңа ізденістерге және нақты нәтижелерге бастасын. Мемлекеттік тіліміздің мәртебесі биіктеп, қолданыс аясы кеңейе берсін, – деді ол.
Конференцияның пленарлық мәжілісінде мемлекеттік тілдің тарихи қалыптасуы мен даму үдерістері, тіл мен ұлттық құндылықтардың сабақтастығы, тілдік тұлғаны қалыптастырудың тиімді жолдары, тіл үйретудің заманауи әдістемесі кеңінен сөз болды.
Алғашқы баяндаманы Ілияс Жансүгіров атындағы Жетісу университеті қазақ тілі мен әдебиеті кафедрасының меңгерушісі, PhD Айна Рахимова жасады. Ол жоғары білім беру жүйесіндегі қазақ тілі мен әдебиетін оқытудың өзекті бағыттары жөніндегі ойларын ортаға салды. Ал Ахмет Байтұрсынұлы атындағы Тіл білімі институтының ғылыми қызметкері, филология ғылымдарының магистрі Қымбат Берікұлы тіл білімінің ғылыми негіздеріне тоқталып, мемлекеттік тілдің дамуына қатысты өзекті мәселелерді саралады. Өз кезегінде Қарағанды облыстық тілдерді оқыту орталығының директоры, PhD докторант Алмагүл Игенова тіл үйрету сапасын арттыруға бағытталған заманауи әдістемелер мен тәжірибелік тәсілдер туралы баяндама жасаса, Ескелді аудандық филиалының меңгерушісі, PhD докторант Әйгерім Молдабаева өңірлік деңгейдегі мемлекеттік тілді оқыту және әдістемелік жұмыстарды ұйымдастыру тәжірибесімен бөлісті.
Пленарлық мәжілістен кейін қатысушылар баяндамашыларға сұрақ қойып, өзара пікір алмасты. Ғылыми орта мен практик мамандар арасындағы ашық пікір алмасу конференцияның мазмұнын тереңдете түсті.
Басқосу жұмысы үш секция бойынша жалғасты. Бірінші секцияда «Мемлекеттік тілдің тарихи қалыптасуы мен даму үдерістері» тақырыбы қарастырылса, екінші секцияда «Тіл, тұлға және ұлттық құндылықтар: тәрбие мен мәдениет сабақтастығы» мәселелері талқыланды. Үшінші секция «Тіл үйретудегі инновациялық технологиялар: жасанды интеллект және заманауи әдістеме» бағытына арналды.
Әсіресе тіл үйрету үдерісіне цифрлық технологиялар мен жасанды интеллект мүмкіндіктерін енгізу мәселесі бүгінгі уақыт талабымен үндесті. Өйткені тілдің болашағын сақтау оның дәстүрлі негізін берік ұстана отырып, жаңа мүмкіндіктерді тиімді пайдалана білумен де сабақтас.
Секция жұмыстарында айтылған ойлар мен ұсыныстар қорытындыланып, қатысушыларға сертификаттар мен дипломдар табысталды.
Конференция соңында Жеңіс Жолдыбаев жиынға арнайы келген ғалымдар мен мамандарға, оқытушыларға, тіл жанашырларына алғыс білдірді.
Мемлекеттік тілдің болашағы оның қағаз жүзіндегі мәртебесімен ғана өлшенбейді. Тілдің шынайы өміршеңдігі оны еркін меңгеріп, күнделікті тұрмысында, кәсіби қызметінде және қоғамдық ортада табиғи қолданатын тілдік тұлғаның қалыптасуымен айқындалады. Ал тілдік тұлға қалыптастыру ұзақмерзімді, жүйелі әрі үздіксіз еңбекті қажет етеді. Сондықтан мұндай ғылыми алаңдардың мәні де осында. Мұнда айтылған ойлар бір күндік жиынның аясында қалып қоймай, білім беру мен тіл үйрету тәжірибесіне еніп, мемлекеттік тілдің қоғамдық қызметін кеңейтуге қызмет етуі тиіс.
Медет ЖҰМАБАЙ
