Алматыда өткен Central Asia Fintech Summit аясында Ұлттық банктің Цифрлық даму орталығы мен Alatau City Authority цифрлық технологияларды дамыту бойынша өзара ынтымақтастық меморандумына қол қойды, – деп хабарлайды 7-su.kz ақпараттық порталы.
Жаңа келісімге сәйкес, тараптар Alatau City ауқымды жобасын іске асыруда озық цифрлық шешімдер мен жасанды интеллект мүмкіндіктерін терең зерделейді. Ұлттық банктің Цифрлық даму орталығы жаңа инфрақұрылымның ақпараттық жүйелерін әзірлеу, интеграциялау және ары қарай сүйемелдеу бағыттарында басты технологиялық серіктес міндетін атқарады.
Тараптар жақын арада бірлескен жұмыстың негізгі бағыттарын нақтылап, арнайы жол картасын бекітеді. Ынтымақтастықтың маңызды қыры – SupTech платформасын Alatau City Authority қызметіне енгізу. Аталған заманауи платформа ауқымды деректерді талдау мен қадағалау процестерін автоматтандыруға жол ашады. Мұндай қадам басқару тиімділігін арттырып, инфрақұрылымды жедел дамытуға мүмкіндік береді.
Саммит аясында Ұлттық банк VEON тобымен де маңызды келісімге келді. Оның шеңберінде телекоммуникациялық фирмалардың бірінші санаттағы төлем ұйымы лицензиясын алуы және халыққа арналған цифрлық төлем қызметтерін сапалы жаңа деңгейге көтеру қарастырылған.
