Қонақүй бизнесі – қызмет көрсету саласының маңызды бағыты және туризмнің ажырамас бөлігі. Қазіргі таңда адамдардың саяхатқа, демалысқа, іскерлік кездесулерге деген қызығушылығы артқан сайын сапалы қонақ үй қызметіне сұраныс көбейіп келеді.
Басты міндет – қонаққа жайлы әрі қауіпсіз орта қалыптастыру. Таза бөлме, сапалы қызмет, жылы қарым-қатынас, тиімді баға және қолайлы орналасу – келушінің таңдауына әсер ететін негізгі фактор. Қонақүй бизнесін табысты жүргізу үшін тек жайлы бөлме ұсыну жеткіліксіз.
Қызметкерлердің кәсібилігі, қонақпен дұрыс қарым-қатынас орнату, заманауи технологияларды пайдалану және қызмет сапасын үнемі жетілдіру қажет. Елдегі ішкі туризмнің дамуы қонақүй саласына жаңа мүмкіндіктер ашып отыр. Аймақтардағы тарихи орындар мен табиғи нысандарға келетін туристер легі артқан сайын шағын қонақүйлерге, отбасылық демалыс орындарына және заманауи орналастыру орындарына қажеттілік көбейеді.
Бір сөзбен айтқанда, қонақүй бизнесі – туризмді дамытатын маңызды сала. Мейманның көңілінен шығу, ұлттық ерекшелікті таныта білу – бұл бизнестің болашағын айқындайтын негізгі құндылықтар. Осындай істі қолға алып, 2002 жылдан бері табысты жұмыс істеп келе жатқан жеке кәсіпкер Гүлназ Кененбаева. Ол талдықорған қаласында орналасқан «Алаша» қонақүйі жоғары сапалы қызмет көрсетудің, жайлы өмір сүру жағдайының және әрбір тұтынушыға мұқият қараудың арқасында қонақтардың сеніміне ие болды.
Туристік саланың тұрақты дамуы және келушілер ағынының ұлғаюы қонақүй кешенін кеңейтуді талап етті. Инвестициялық жобаны іске асыру үшін кәсіпкер «Сыйақы мөлшерлемесінің бір бөлігін субсидиялау» бағдарламасы арқылы («Шағын және орта кәсіпкерлікті қолдау» бағыты) мемлекеттік қолдауды пайдаланды.
Өткен жылы «Даму» қорының қолдауымен жоба іске асырылды. Алынған қаражат қонақүйдің негізгі ғимаратына жапсарлас құрылыс салуға жұмсалды.
Жобаны іске асырудың нәтижесінде қонақүй кешені өз мүмкіндігін едәуір кеңейтіп, қонақтардың заманауи талаптарына жауап беретін 20 жаңа жайлы бөлме пайдалануға берілді. Кеңейту ұсынылатын қызметтердің сапасын арттыруға, қонақүйдің өткізу қабілетін арттыруға және туристер, іссапарға жіберілген мамандар мен іскерлік саяхатшылар үшін неғұрлым қолайлы жағдай жасауға мүмкіндік берді. Жобаның маңызды нәтижесі 12 жаңа жұмыс орнын құру болды. Бұл халықты жұмыспен қамту мен өңір экономикасын дамытуға өз үлесін қосты.
Алынған қолдау бізге ұзақ уақыт бойы жоспарлаған жобаны іске асыруға мүмкіндік берді. Біз субсидиялау бағдарламасының арқасында жаңа қонақүй корпусын салып, нөмірлік қорды 20 нөмірге ұлғайтып, жаңа жұмыс орындарын ашып, қызмет көрсету сапасын арттыруға мүмкіндік алдық. Бұл біздің бизнесті дамытудың маңызды кезеңі болды және одан әрі өсудің жаңа жолдарын ашты, – дейді Гүлназ Молдабекқызы.
Бүгінде «Алаша» қонақүйі келушілерге жайлы өмір сүру және жоғары қызмет көрсету деңгейін ұсына отырып, табысты дамуын жалғастыруда. Кәсіпорынның тарихы мемлекеттік қолдау шараларының кәсіпкерлерге инвестициялық жобаларды іске асыруға, қызмет көрсету саласын дамытуға, жұмыс орындарын құруға және облыстың әлеуметтік-экономикалық дамуына үлес қосуға қалай көмектесетінінің жарқын мысалы саналады.
Айгүл БАЙБОСЫН
