Өңірлік коммуникациялар қызметі алаңында Жетісу өңіріндегі жұмыссыздық деңгейін төмендету, халықты нәтижелі еңбекке баулу, тұрақты жұмыс орындарын құру және әлеуметтік қорғау жүйесінің атқарған кешенді жұмыстары сараланды. Жетісу облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Сания Наурызбаева баяндама жасады.
Жетісу облысының халық саны 684,0 мың адамды құрайды. Өңірде жұмыссыздық деңгейі 4,6 % шамасында сақталып отыр, яғни жұмыссыздар саны 14,1 мың адамға тең. Өңірлік жұмыспен қамту картасы аясында жыл соңына дейін 19 200 адамды жұмысқа орналастыру жоспарланса, оның 11 837-сі тұрақты орындарға тиесілі. Қазіргі күнге 17 847 жаңа жұмыс орны құрылып, жоспар 93,0%-ға орындалды. Оның ішінде 10 871-і – тұрақты жұмыс орны.
Спикер өз сөзінде еңбек нарығын дамытудың басымдықтарына тоқталды:
«Тұрғындарды нәтижелі жұмыспен қамту – өңір экономикасының тұрақтылығының негізгі кепілі. Еңбек нарығын дамыту тұжырымдамасы аясында жұмыспен қамтудың белсенді шараларына жергілікті бюджеттен 8,9 миллиард теңге қарастырылды. Өңірде азаматтардың кәсіби дағдыларын арттыруға, жастар мен аға буын өкілдеріне еңбек жолын ашуға ерекше көңіл бөлінуде», – деді Сания Наурызбаева.
Мемлекеттік бағдарламалар аясында субсидияланатын жұмыс орындарына 6 712 адамды жолдау көзделген. Атап айтқанда, «Жастар тәжірибесі» жобасына 710 түлек жіберілсе, «Күміс жас» жобасы бойынша 568 аға буын өкілі жұмысқа орналасты. Сонымен бірге қоғамдық жұмыстарға 4 409 адам, әлеуметтік жұмыс орындарына 481 азамат тартылды.
Еңбек нарығының сұранысына сай 782 адам қысқа мерзімді кәсіптік оқудан өтті. Ал «Бастау Бизнес» жобасы аясында 708 адам білім алып, 104 азаматқа 400 АЕК көлемінде қайтарымсыз грант берілді. Цифрлық мүмкіндіктер де кеңінен қолданылуда: enbek.kz порталы арқылы 2 652 адам онлайн-оқыту курстарын аяқтады.
Әлеуметтік саланың көрсеткіштері де оң серпінді көрсетеді. Жетісу өңірінде аз қамтылған 31,0 мыңнан астам азаматқа 2 505,1 миллион теңге көлемінде әртүрлі әлеуметтік көмек көрсетілді. Атаулы әлеуметтік көмек (АӘК) 2 913 отбасыға (15 773 адам) беріліп, 1 559,8 миллион теңге қаржы жұмсалды. АӘК алушы отбасылардың 1 жастан 6 жасқа дейінгі 5 106 баласына 168,7 миллион теңге қосымша төлем берілді.
«Әлеуметтік қолдау жүйесі тек қаржылай төлемдермен шектелмейді, әрбір муқтаж отбасының тұрмыс сапасын жақсартуды көздейді. Ауылдық жерлердегі білім, денсаулық сақтау, мәдениет және спорт саласының 5 462 қызметкеріне отын сатып алуға 124,5 миллион теңге әлеуметтік көмек төленді. Сонымен бірге тұрмыстық зорлық-зомбылық құрбандарына арналған орталық пен әлеуметтік бейімдеу орталығы жүздеген азаматқа оңалту қызметтерін ұсынды. Әрбір тұрғын мемлекеттің қамқорлығын сезінуі тиіс», – деп атап өтті басқарма басшысының орынбасары.
Өңірде мүгедектігі бар 25 689 азамат тіркелген. Оларды оңалту құралдарымен қамту деңгейі 80,2%-ға жетті (12 762 адам), аталмыш көрсеткіш республикалық орташа деңгейден (74,4%) жоғары. Инфрақұрылымды бейімдеу жұмыстары бойынша Жетісуда 1 120 нысан белгіленген, 2026 жылы жоспарланған 172 нысанның 137-сі (79,7%) толық бейімделді.
Мүмкіндігі шектеулі азаматтардың еркін қозғалуы үшін «Инватакси» қызметі қарқынды дамып келеді. Өңірде 32 арнайы автокөлік жұмыс істеп, 824 азаматқа қызмет көрсетті.
Басқарма өкілі аталған бағытты былайша түйіндеді:
«Кедергісіз орта қалыптастыру және арнаулы әлеуметтік қызметтердің сапасын арттыру – басты міндеттердің бірі. Облыста 13 арнаулы орталық жұмыс істеп, мыңдаған азаматқа сапалы қызмет ұсынуда. Шетелдік жұмыс күшін тартуда да жергілікті мамандардың үлесі 93,8%-ды құрап отыр. Ал қандас мәртебесі берілген 304 этникалық қазақ өңірге орнығып, жаңа өмір бастауға мүмкіндік алды. Біз өңірдегі әрбір тұрғынның игілігі үшін жүйелі жұмысты жалғастырамыз».
Брифинг соңында Сания Дүйсенбіқызы журналистердің сұрақтарына тұжырымды жауап беріп, қойылған міндеттер мен бағдарламалардың орындалуы тұрақты бақылауда болатынын жеткізді.
