Қазақстан Республикасы Ішкі істер министрлігі Ұлттық ұланының «Орталық» өңірлік қолбасшылығына қарасты 6505 әскери бөлімінде жеке құрамның тұрмыстық жағдайын жақсартуға бағытталған жаңа жоба іске асырылды, – деп хабарлайды 7-su.kz ақпараттық порталы.
Әскери қызметшілердің қызмет өткеру сапасы мен олардың әлеуметтік-тұрмыстық жағдайы қай кезде де басты назарда. Осы ретте IVECO шағын автобусының базасында арнайы жылжымалы асхана жабдықталды. Ендігі кезде аталған автокөлікті стационарлық асханасы жоқ далалық оқу-жаттығулар мен арнайы қызметтік тапсырмаларды орындау барысында пайдалануға мүмкіндік туып отыр. Мұндай инновациялық шешімнің қабылдануына еліміздің шұғыл континенттік климаты, соның ішінде күзгі-қысқы кезеңдегі ауа райының қолайсыздығы себеп болды.
Шағын көліктің ішкі кеңістігі жеке құрамның күнделікті қажеттіліктерін ескере отырып, барынша тиімді қайта өзгертілді. Мобильді тамақтану орны бір мезетте 5-6 адамға қызмет көрсетуге арналған. Оның ішінде азық-түлікті қауіпсіз сақтауға, дайын тағамдарды жылдам жылытуға арналған заманауи тұрмыстық техникалар орнатылған. Автобус салонында жинақы шкаф, микротолқынды пеш, электр шәйнегі және ыңғайлы үстел орналастырылған. Сондай-ақ гигиена талаптарын сақтау үшін таза су мен пайдаланылған суға арналған екі арнайы контейнер қарастырылған. Тұрмыстық құралдар арнайы инвертор арқылы үздіксіз электр қуатымен қамтамасыз етіледі.
Мобильді асхананы жасау кезінде микроавтобустың негізгі жүк тасымалдау мүмкіндігі де толық сақталды. Барлық жабдықтар көліктің корпусын бұрғыламай немесе дәнекерлеу жұмыстарын жүргізбей-ақ, штаттық бекітпелерге орнатылды. Бұл артқы есіктерді еркін ашуға және қажетті жүктерді кедергісіз тиеп- түсіруге жол ашады. Қажеттілік туындаған жағдайда барлық құралдарды тез арада бөлшектеп, көлікті бастапқы қалпына келтіруге болады.
Қазіргі таңда арнайы мамандар жаңа жобаның тиімділігін сараптауда. Егер пилоттық бастама оң нәтижесін берсе, мұндай жылжымалы орындар Ұлттық ұланның өзге де әскери бөлімдерінде енгізіледі. Әскери қызметшілердің тұрмысын жақсарту – олардың жауынгерлік дайындығы мен Отанды қорғауға деген ынтасын арттыратын басты фактор.
