Армения астанасы Ереван қаласында өтіп жатқан COP17 аясындағы Биоалуантүрлілік мәселелері бойынша көшбасшылар саммитінде Қазақстан Президенті Қасым-Жомарт Тоқаев маңызды халықаралық бастамалар көтерді, – деп хабарлайды 7-su.kz ақпараттық порталы.
Ауқымды экологиялық форумда Мемлекет басшысы табиғи экожүйелерді қорғау мен биоалуантүрлілікті сақтау ісінде заманауи инновациялардың роліне ерекше тоқталды. Мемлекет басшысы цифрлық трансформация мен жасанды интеллект әдістері табиғи ресурстарды тиімді басқарудың негізгі кілтіне айналғанын атап өтті.
Жиын барысында Қасым-Жомарт Тоқаев:
«Бүгінде тиімді серіктестік цифрлық технология мен жасанды интеллектіге арқа сүйеуі қажет. Себебі олар экожүйелерді мониторингтеу, табиғи ресурсарды басқару және экологиялық қауіп-қатерді болжау әдістерін түбегейлі өзгерте алады. Қазақстан үшін жасанды интеллектіні дамыту және цифрлық трансформация – ұлттық басымдық. Астанадағы Alem.AI халықаралық жасанды интеллект орталығын бірлескен ғылыми зерттеулер жүргізу, биоалуантүрлілік деректерін талдау, алдын ала ескерту жүйелерін әзірлеу, сала мамандарын даярлау платформасы ретінде пайдалануды ұсынамыз», – деді.
Сондай-ақ Президент аймақтық экологиялық ынтымақтастықты арттыру мақсатында Биоалуантүрлілік жөніндегі конвенция Хатшылығының өңірлік кеңсесін Алматы қаласында орналастыруды ұсынды. Мемлекет басшысының пікірінше, мұндай орталық Орталық Азия елдеріне биоалуантүрлілік жөніндегі Куньмин-Монреаль жаһандық негіздемелік бағдарламасын тиімді жүзеге асыруға көмектеседі. Сонымен бірге ғылыми тәжірибе алмасу мен ортақ жобаларды жүргізуге берік серпін береді.
Саммит алаңында Мемлекет басшысы бірқатар маңызды халықаралық кездесулер де өткізді. Мемлекет басшысы ЮНЕСКО Бас директоры Халед Әл-Ананимен жүздесіп, білім беру, ғылым және мәдениет саласындағы әріптестік келешегін талқылады. Ал Еуропалық комиссияның атқарушы вице-төрағасы Тереза Риберамен әңгімелесу барысында Қазақстан мен Еуропалық одақтың орнықты даму, энергетика мен қоршаған ортаны қорғау бағытындағы серіктестігі сөз болды.
Бұл халықаралық бастамалар мен ұсыныстар Жетісу өңірі сияқты эко-бағыты жоғары аймақтарға да тікелей оң ықпал етеді. Аймақтағы Алакөл, Балқаш көлдерінің бассейнін табиғи мониторингтеу, Іле-Алатауы мен Жоңғар Алатауы бөктеріндегі сирек фауна мен флораны сақтауда жасанды интеллект жүйелерін қолдану өңір экологиясын жаңа белеске көтереді. Жасыл технологиялар мен ғылыми орталықтардың жұмысы еліміздің тұрақты дамуының кепілі.
