Өңірде халықты қолжетімді баспанамен қамтамасыз ету, ауылдық елді мекендердің инфрақұрылымын дамыту, тұрғын үй кезегінде тұрған азаматтарды қолдау және Baspana Market порталы арқылы өтініш қабылдау үдерісін цифрландыру бағытында нақты жұмыстар жүзеге асырылуда, – деп хабарлайды 7-su.kz ақпараттық порталы.
Жетісу облысы бойынша ауылдық елді мекендердегі арендалық тұрғын үйлерге өтініш қабылдау 12-18 қараша аралығында жүргізіледі. Тұрғын үй кезегінде ресми түрде тұрған азаматтар ауылдық аймақтарда салынған жаңа баспаналарға ешқандай делдалсыз, өз бетінше онлайн өтініш тапсыра алады. Аталған бастама ауыл халқының тұрақтануына, жас отбасылардың туған жерінде еңбек етуіне және өңірдегі тұрғын үй мәселесін жүйелі шешуге зор мүмкіндік береді. Цифрлық платформалардың енгізілуі баспана бөлу рәсімінің ашықтығын қамтамасыз етіп, азаматтардың уақытын үнемдеуге жағдай жасайды.
Жалпы облыс көлемінде кезекте тұрған азаматтарға 48 арендалық тұрғын үй ұсынылып отыр. Олар өңірдің сегіз ауданы бойынша қажеттілікке сәйкес бөлінген. Нақтырақ айтқанда, баспаналардың басым бөлігі Кербұлақ ауданына тиесілі, онда 15 нысан пайдалануға беріледі. Сарқан ауданында 10 тұрғын үй, ал Ақсу ауданында 8 нысан дайындалған. Сонымен қатар Көксу ауданында 5 баспана, Ескелді ауданында 3 нысан және Қаратал ауданында 3 тұрғын үй өз иелерін табады. Ал Алакөл мен Панфилов аудандарында 2 нысаннан қарастырылған. Мұндай ауқымды үлестірім өңірдегі әрбір ауданның әлеуметтік дамуына серпін беріп, ауыл тұрғындарының баспаналы болу арманын жүзеге асыруға жол ашады.
Өтініш беру тәртібі толықтай автоматтандырылған. Азаматтар құжаттарды «Отбасы банкінің» ресми Baspana Market порталы арқылы электронды түрде тапсыра алады. Дегенмен мамандар өтініш жолдамас бұрын маңызды талаптарды мұқият ескеруге кеңес береді. Ең алдымен, таңдалған тұрғын үйдің жалпы шаршы метрі өтініш берушінің отбасы құрамына толық сәйкес келуін тексеру қажет. Егер тұрғын үй көлемі белгіленген нормативтік талаптарға сай келмесе, жүйе өтінішті қабылдамауы немесе кері қайтаруы мүмкін. Сондықтан үміткерлер порталдағы әрбір нысанның сипаттамасын мұқият оқып, жеке деректері мен отбасы мүшелері туралы мәліметтерді алдын ала нақтылап алғаны жөн.
