Кие қонып, бақ дарыған Көксу ауданының тарихы елге үлгі боларлық маңызды кезеңдерді қамтиды. Киелі өлке елдің дамуында өзіндік орны бар тарихи аймақ. Ауданның 80 жылдық мерейтойына орай Балпық би кентінде «Кенен жерім Көксуым» атты мерекелік шара өтті. Оған облыс әкімі Бейбіт Исабаев, аудан тұрғындары мен қонақтары қатысты.
Меймандар алдымен қолөнер бұйымдары, қылқалам шеберлерінің туындылары, көрнекті тұлғалардың өмірі мен еңбегіне қатысты бұйымдар қойылған көрмемен танысты. Ал Мұқыры халық театры облыстың құрылу тарихынан сыр шертетін театрландырылған қойылымды жұртшылық назарына ұсынды.
Көксулықтарды мерейлі тойымен құттықтаған Бейбіт Исабаев Ескелді би, Балпық әулие, Қабылиса жырау, Қалқа Жапсарбаев, Социалистік Еңбек Ерлері Нұрмолда Алдабергенов, Зылиха Тамшыбаева сынды күллі қазаққа ортақ тұлғалардың алтын бесігі болған өңірдің бүгінгі жетістіктері көңіл қуантатынын тілге тиек етті.
– Жері майса, суы мол, берекесі жарасқан Көксу ауданы тоғыз жолдың торабында, күре жолдың бойында тұр. Бүгінде Көксу ауданының тұрғындары экономиканың негізгі салаларында жетістіктерге жетіп, өңірдің көркеюіне өз үлестерін қосуда. Өткен 9 айда ауылшаруашылығы өнімінің көлемі 25,8 миллиард теңгені, ал өнеркәсіп өнімінің көлемі 27,6 миллиард теңгені құрады. Жалпы, 2023 – 2024 жылдары ауданның инфрақұрылымдық, әлеуметтік нысандарын салуға, қайта жаңғыртуға және жобалау жұмыстарына облыстық бюджеттен 16 млрд. теңгеден астам қаржы жұмсалды. Ауданның 80 жылдық тарихы – еңбектің, ерліктің, бірліктің тарихы. Бүгінгі тойдың ұрпақ үшін берер тәлімі мол болатыны анық, – деген аймақ басшысы аудан тұрғындарына ақжарма тілегін білдірді.
Бірлігі мен берекесі жарасқан ауданның 95%-ы көгілдір отынға қол жеткізген. Келер жылы аудан халқы толықтай табиғи газға қосылады. Одан бөлек, жаңа білім ордалары ашылып, медициналық нысандар, мәдени ошақтар да ел игілігіне берілуде.
Жетісу облысының Құрметті азаматы, еңбек ардагері Наурыз Қылышбаев пен ҚР Парламенті Мәжілісінің депутаты Болат Керімбек көксулықтарды мерейтоймен құттықтады.
Аудан әкімі Дәулет Халелов ауданның бүгінгі жетістігі туралы айтып, болашақта атқарылатын жоспармен бөлісті. Мұнан соң мерейтойға арнап шығарылған «Құтқа құндақталған Көксуым» атты кітаптың тұсауы кесіліп, «Көрікті мекен – Көксуым» атты ақындар мүшәйрасының жеңімпаздары марапатталды.
Мерейтойға келушілерге арнап қол күрес, гір тасын көтеру, құнан бәйге, аламан бәйге сынды жарыстар өткізіліп, жеңімпаздар бағалы сыйлықпен марапатталды.
Еңлік КЕНЕБАЙ
