Тарихы мыңжылдықтардан тін тартатын көне Жаркент ежелден шеберлер қаласы. Оның бүгінгі келбетінен әр дәуір шеберлерінің қолтаңбасын аңғаруға болады.
Батысында Өсек өзені жағасындағы биік жарларға тұмсық тірейтін көне қаланың бүгінде жан-жағы кеңейіп, іргелес орналасқан Жерұйық, Головацкий, Кішішыған, Үлкеншыған ауылдары болашақта қала аумағына қосылатынын қазіргі құрылыс қарқыны аңғартады. Бүгінде қалада мейрамхана мен қонақүй, сауда орындары көп салынуда. Соңғы 5 жылда баспана құрылысы ерекше қарқын алды. Өткен жылы 20,7 млрд. теңге игеріліп, 61,9 мың шаршы метр, биылғы 9 айда 10 мың шаршы метрден аса тұрғын үй пайдалануға берілді.
Қазір Жаркент қаласында 60 пәтерлі 2 үй салынуда, одан басқа баспана кезегіндегілер үшін тағы 80 пәтерлі тұрғын үй құрылысы басталды. Алғашқы 2 тұрғын үй құрылысын «Құрылыс индустрия компаниясы» ЖШС қолға алып, қазір оның 90 пайызы аяқталды. Құрылыс алаңында 58 жұмысшы еңбек етеді, 3 техника қолданыста. Бұл үйлердің айналасын көріктендіру мен инженерлік-коммуникациялық жүйесін жасауды «Грант құрылыс тобы» ЖШС атқаруда. Құрылыс материалдарының шұғыл қымбатауына және Алматы облысының екіге бөлінуіне байланысты өткен жылдың басында жұмыс біраз уақыт тоқтап, құрылыс жобасына қосымша қаржы қарастырылды. Екінші нысанда екі 80 пәтерлі тұрғын үйдің құрылысы жүргізілуде.
– Биыл кезекте тұрған 700 адамға қалада салынып жатқан үйлерден баспана беріміз,– дейді өңір басшысы Марат Сағымбек.
Бұдан басқа 100 аз қамтылған жанұяға бюджет қаржысына жаңа тұрғын үйлер сатып әперуге ақша бөлінеді. Аудандағы барлық құрылыс жұмысының сапалы әрі уақытылы атқарылуы құзырлы орындардың тұрақты бақылауында. Соңғы жылдары құрылысқа жыл сайын бөлінетін қаржы 300 млн.-нан 30 млрд. теңгеге дейін көбейді. Нәижесінде Жаркент көріктеніп, өсіп, гүлденіп келеді.
Мырзағали Нұрсейіт
Жаркент қаласы
