Еңбекші ауылдық округі әкімдігінің ұйымдастыруымен Аналар күні ерекше форматта аталып өтті. Мәдени-сазды кешке аудан және Еңбекші ауылдық округі әкімдігінің қызметкерлері, ақ жаулықты аналар мен Зылиха Тамшыбай атындағы Мәдениет үйі және «Жас ұрпақ жастар» қоғамдық бірлестігінің өкілдері қатысты.
Шара аясында халқымыздың ұрпақ тәрбиесіндегі тағылымы мен ұлтымыздың салт-дәстүр, әдет-ғұрпы туралы естеліктер айтылып, жастарға шабыт беріп, елді береке-бірліке шақырды. Ақ жаулықты аналар мен кәсіпкер әйелдер қыз-келіншектерді кәсіптендіруге қатысты тәжірибесімен бөлісті. Ал Зылиха Тамшыбай атындағы Мәдениет үйінің өнерпаздары күмбірлете күй шертіп, тамылжыта ән салып, бұрала билеп, шараның көркін кіргізді.
Аналар күнін атап өту – нәзік жандардың мәртебесін көтеру, ана болудың маңыздылығын арттыруға бағытталған. Әрине, бір қолымен бесікті, екінші қолымен әлемді тербеткен асыл жандардың өркениетті қоғам құрудағы үлесі мол. Сондықтан оларға көрсетілетін құрметте көп болмақ. Осындай мақсатта ұйымдастырылған мәдени шараның соңы «Ақниет» мейрамханасында жалғасты. Ақ дастарқан басында Еңбекші ауылдық округінің әкімі Мұрат Қобдалиев ауылдың өркендеуіне үлес қосып жүрген аналарға алғысын жеткізіп, құрмет көрсетті.
Зирагүл НҰРДАНБЕКҚЫЗЫ,
Зылиха Тамшыбай атындағы Мәденйет үйінің қызметкері
Еңбекші ауылы,
Көксу ауданы
