Жеңіс күні қарсаңында Жетісу облыстық мемлекеттік архивінде «Ерлігі елге мұра» атты «дөңгелек үстел» өтті. Zhansugurov college студенттері мен оқытушылары, БАҚ өкілдері, мұрағат қызметкерлері қатысқан салтанатты шара соғыс жылдарындағы ерлердің ерлік істері өрнектелген бейнефильммен басталды.
Шара аясында облыстық мұрағаттың бөлім басшысы Кенже Қанапиянова қатысушыларға жетісулық соғыс ардагерлеріне қатысты құжаттарды таныстырып, жастардың ғылыми-іздену жұмысына көмегі тиетін маңызды ақпараттармен бөлісті. Сондай-ақ, бүгінгі таңда республика бойынша Екінші дүниежүзілік соғысқа қатысушылардың бірыңғай базасы жасақталып жатқанын айта келіп, оған облыстағы мұрағаттарда сақталған құжаттар бойынша аты мәлім де беймәлім соғыс ардагерелерінің толық тізімі жолданғанын жеткізді.
Келесі кезекте мекеме қызметкерлері архив деректері бойынша құрастырылған кітаптарды таныстырып, мекеме директорының орынбасары Бағила Нүсіпова құжаттарды сақтаудың тәртібі туралы айтып берді. Осыдан кейін қатысушылар мұрағат қорларына экскурсия жасап, құжаттардың қалай сақталатындығы және оны зерттеу, ізденіс жұмысына пайдалануға қатысты тәжірибелерімен танысты.
– Кездесуде айтылған соғыс ардагерлері – нағыз батырлар. Осындай кездесу ұйымдастырып, тағылымды тәрбие бергені үшін архив қызметкерлеріне алғыс айтамыз. Өйткені бүгінгі күн ертең тарихқа айналады. Біз Жеңісті жақындатқан барлық ардагерлерге борыштымыз. Осы кісілердің ерлігі болмаса, бүгінгі еркін еліміз де болмас та еді. Бүгін көргеніміз бен естігенімізді достарымыз бен таныстарымызға бөлісіп, олардың да архивке деген қызығушылығын оятуға ықпал етеміз, – дейді 3-курс студенті, болашақ ағылшын тілі пәнінің ұстазы Мейрамбек Оспанбай.
Кездесу аясында облыстық «Jetіsý» және «Вестник Жетісу» газетінің тілшілері өз ойымен бөлісіп, жастарды елжандылық пен Отан қорғаудағы абыройлы істерге белсене атсалысуға шабыттандырды.
Қ. ОМАРАҚЫН
