Талдықорған қаласындағы әскери-әуе күштерінің №21751 әскери бөліміне Кеңес Одағының екі мәрте батыры, әскери ұшқыш Сергей Луганскийдің есімі берілді. Салтанатты шараға Қорғаныс министрі генерал-полковник Руслан Жақсылықов, облыс әкімі Бейбіт Исабаев, Кеңес Одағының Батыры, Халық қаһарманы авиация генерал-майоры Тоқтар Әубәкіров және Халық қаһарманы авиация генерал-майоры Айдын Айымбетов қатысты.
Әскери бөлімнің аумағында Сергей Луганскийдің бюсті ашылды. Шараға арнай келген қонақтар батырдың бюстіне гүл шоқтарын қойып, бір минут үнсіздікпен еске алды.
Өз кезегінде Қорғаныс министрі генерал-полковник Руслан Жақсылықов: «Ұлы Отан соғысы жылдарында бес жүзден астам қазақстандық Кеңес Одағының Батыры атағына ие болды. Оның ішінде Леонид Беда, Талғат Бигелдинов, Сергей Луганский және Иван Павлов Батыр атағын екі мәрте алды. Қарулы күштердің жеке құрамы Мемлекет басшысының ержүрек ұшқыштың есімін мәңгілік есте қалдыру туралы ұсынысын қуана қабылдады, – деді.
Жиында Бейбіт Өксікбайұлы:
Биылғы Жеңіс күні – соғыс батыры, алғашқы Қорғаныс министрі С.Нұрмағамбетовтің және Халық Қаһарманы Р.Қошқарбаевтың 100 жылдықтарымен тұспа-тұс келіп отыр. Мемлекет басшысы Қасым-Жомарт Тоқаев биылғы жылғы Ұлттық құрылтайдың ІІІ отырысында Талдықорғандағы осы әскери базаға Сергей Луганскийдің атын беру туралы бастама көтерген болатын. Бүгін, міне, сол игі бастама жүзеге асырылып, Кеңес Одағының екі мәрте батыры, әскери ұшқыш Сергей Данилович Луганскийдің есімін беру және бюстінің ашылу салтанатына куә болып отырмыз. Батырдың есімін иелену – әскери бөлім үшін үлкен мәртебе әрі зор жауапкершілік. Бұдан былай да Отан алдындағы жауынгерлік парыздарыңызды лайықты орындап, ел қорғанысы шебіндегі еңбектеріңіздің жемісті болатынына сенемін, – деді.
Шарада Сергей Луганскийдің өмірі мен ерлігі туралы фильм көрсетіліп, көрме ұйымдастырылды. Қарулы күштер шығармашылық ұжымдарының күшімен концерттік бағдарлама дайындалды.
Айдар ҚАЛИЕВ
Суретті түсірген Жеңіс Ысқабай
