Қаланың көркейіп, дамуына жағдай жасау жолында терін төге қызмет істеп жүрген жандар бар. Олар олқылықты оңалтып, кем-кетікті лезде ретке келтіруге аянбай күшін салып келеді. Көзге көп көріне бермейтін мамандармен жұмыс барысында жолықтық.
Қаланың қарбалас тіршілігі саябырсуды еш қаламайды. Қыстың қатулы аязы да, жаздың аптап ыстығы да уақытпен таласып өмір сүріп жатқан жұрттың көшін еш тежей алмауда. Осы дамылсыз тірлікте әркімнің өз миссиясы бар десек, соны орындауда қажыр танытып, жүктелген жүкті абыроймен арқалап жүрген еңбек иелеріне қандай қошемет көрсетсек те лайық.
Өткен аптаның сәрсенбісінде таң қылаң бере қармана қызмет қылып жатқан 15 шақты жігітті көрдік. Жандарына таяп едік «Талдықорған Жылу Сервис» орталығының қызметкерлері екен. Ғали Орманов көшесіндегі жер- асты су құбыры жарылып, тіршілік нәрі жер бетіне шығып кеткен көрінеді. Құбырды ауыстыруға жұдырықтай жұмыла кіріскен азаматтардың бірін сұхбатқа тарттық. Сөйтсек дәл учаске басшысына жолығыппыз. Мән-жайды егжей-тегжейлі баяндаған Бауыржан Байбарақов мұның қалыпты жағдай екенін жеткізді:
– Бұл су құбыры 56/70 тұрғын үйге жақын жерде жарылып отыр. Арық суының салдарынан құбырдың шіріп кеткенін байқадық. Қазір соны ауыстырып жатырмыз. Біздің негізгі жұмысымыз таңғы сағат 8-ден кешкі сағат 17.00-ге дейін. Ал мұндай апатты жағдайда жұмысшылармен қайтып кетпейміз. Жұмысты толық бітіреміз. Талдықорған қаласы бізде R1, R2 болып екіге бөлінеді. Авариялық жағдай қазір R1 ауданы жақта орын алып отыр.
Бауыржан Байбарақовтың «Талдықорған Жылу Сервис» орталығында қызмет істеп жүргеніне 10 жылдан астам уақыт болған. Қарапайым жұмысшы болып бастағаннан бері қызметінің сатылап өсіп келе жатқанын айтады. Қоластындағы қызметкерлерінің өте тәжірибелі, білік-білімі толысқан мамандар екенін сөз етеді.
Ұжым Қуаныш Жекмұрзанов, Олег Сухаруков, Ғазиз Шукуров сынды өз ісіне адал, жұмысын айрықша құлшыныспен атқаратын азаматтардан жасақталған. Солардың бірі – Бекжан Тойкен. Аталған мекемеде 5 жылдан бері дәнекерлеуші болып қызмет ететін оның айтуынша, екі қолға бір күрек табылғанымен сыйыса алатын орта табу қиын.
– Мұндағы жігіттермен қызметтес болғаныма біраз уақыт болды. Риза болатыным, барлығы жауапкершілік жүгін көтере біледі. Ұжым өте ұйымшыл. Кез келген ауыртпашылықты осы әріптестеріммен бірге еңсеріп келеміз.
Қыстың қақаған суығында темір ұстап, жер қазудың, шұңқырға түсіп суға малшынудың азапшылығын былайғы жұрт біле бермес. Ал мұндағы қызметкерлер ондайдың талайын бастарынан өткеріп тұратындығына өздері ғана куәгер екеніне жүрекпен сенеміз. Суық күні қалың қарашаға жылу сыйлап жүрген «Талдықорған Жылу Сервис» орталығының қызметкерлеріне деген алғысымыз шексіз!
Медет ЖҰМАБАЙ
Суретті түсірген Р. ҚАДЫРОВ
