Алматы-Өскемен республикалық тас жолымен келе жатқан жүк көліктері қарлы боранда қалған, деп хабарлайды 7-su.kz желілік басылымы.
Жолдың көрінбеуі мен дауылдың салдарынан Алакөл ауданының аумағында алты ауыр жүк көлігі қарда тұрып қалған.
Көліктерді қар қырсауынан шығаруға сол учаскені патрульдеп жүрген полиция қызметкерлері көмектесті. Облыстық ППБ полицейлері жол қызметтері мен арнайы техниканы тарта отырып, төрт «Камазды» сүйреп шығарды. Қазіргі уақытта, тағы екі ауыр жүк көлігін қар құрсауынан шығару жұмыстары жүргізілуде.
– Қысқы жолдар – жүргізушілер үшін үлкен сынақ. Барлық көлік иелеріне қыс мезгілінде жүру жауапкершілікті қажет ететінін еске саламыз. Көліктің дұрыс техникалық жағдайына көз жеткізіп, аязда қатпайтын жанармайға ауысу қажет. Ауа-райы болжамдары мен төтенше жағдайлар қызметінің ескертулерін ескере отырып, ұзақ сапарларды жоспарлаңыз. Кез келген жағдайда көмекке жүгіне алатындай арнайы қызметтерге хабарласу үшін өзіңізбен бірге жылы киім, мобильді байланыс құралдарын, оның ішінде қуаттау көзі бар құрылғыны алып жүруді ұмытпаңыз. Сақ болыңыз және жол қозғалысы ережелерін қатаң сақтаңыз, – деп атап өтті Жетісу облысы ПД ППБ командирі Мәди Арғынбаев.
Фото: Жетісу облысы ПД
