Өткен жылы жұмыртқа бағасы 13% -ға өскен. Соған байланысты елде тауық жұмыртқасы өндірушілеріне тексеру жүргізілді.
Нәтижесінде Қазақстанның бәсекелестікті қорғау және дамыту агенттігі жалпы құны 124,8 млн. теңге көлемінде айыппұл салған. Агенттік тауық жұмыртқасын көтерме саудада сату нарығындағы бәсекелестіктің жай-күйіне талдау жүргізді. Елде негізінен 34 құс фабрикасы жұмыс істейді. Алдыңғы жылы Қазақстанда жұмыртқа өндірісі мен экспорт көлемі жақсы көрсеткішке ие болып, импорт біраз есеге қысқарған. Ал өткен жылы керісінше өндіріс көлемі мен экспорт төмендеп, импорт ұлғайған.
Сонымен бірге, импортталатын премикс, ветеринарлық препарат, қаптама бұйымдарының қымбаттауы да тауық жұмыртқасы бағасының өсуіне өз әсерін тигізген. Агенттік хабарлағандай, құс фабрикалары өнімін кәсіпкер емес, жеке тұлғалар арқылы сатудың көбейгені байқалған. Сондай-ақ, әлеуметтік маңызы бар азық-түлік тауарын сататын сауда желілерінде де белгіленген баға мөлшерін сақтамағаны анықталған.
Айгүл Байжұмақызы
Фото: depositphotos/ryzhov
