Елде асфальтбетон жасауға арналған арнайы технология әзірленді. Оны даярлаған мамандар қазірдің өзінде жол құрылысы саласында серпіліс болатынын айтады.
Тұжырымдаманың негізіне ғалымдар «жасыл» технологияларды тұрақты дамыту мен пайдалану қағидаттарын пайдаланды. Еуразия ұлттық университетінің ғалымдары шетелдіктермен бірге асфальтбетонның жаңа құрамын шығаруда. Оған минералдар, тұтқыр заттар және арнайы қоспалар кіреді. «Ең бастысы, бәрін дұрыс есептеу керек», дейді сарапшылар.
ENU-Lab ғылыми-өндірістік орталығының директоры Марат Конкаков: «Суперасфальт әрбір өңірдің барлық климаттық ерекшеліктерін, автокөлік қозғалысын ескере отырып, жолдарға түсетін жүктемені ескеруге және 10-15 жыл төселіп жататын асфальтты жобалауға мүмкіндік береді. Осы технологияны бейімдеп, нормативтік құжаттардың стандарттарын әзірлегіміз келеді, ол бойынша барлық асфальт-бетон зауыттары жұмыс істейтін болады», – дейді.
Ғалымдардың сөзінше, суперасфальт жол құрылысының сапасын жақсартпақ. Бірақ, бұл болашақтағы болжам. Қазір қоспа үлгілер де сынақтан өтуде. Егер бәрі сәтті өтсе, онда қазақстандықтар технологияны ел жолдарында сынай алады. Мұндай бастаманы «ҚазАвтоЖол» ҰК» АҚ да қолдап отыр.
– Біз жаңа технологиялар үшін ашықпыз. Қазақстанда жаңа технологияларды апробациялау және әзірлеумен айналысатын «ҚазЖолҒЗИ» АҚ жұмыс істейді. Жалпы, егер технология тиімді болса және ол өзін сапалы деп көрсетсе, біз оны пайдалануға дайынбыз, – дейді «ҚазАвтоЖол» ҰК» АҚ сыртқы қарыздар департаментінің басшысы Алтынбек Өмірзақов.
Жаңа қоспаны әзірлеу жұмыстары былтыр қараша айында басталған. Үш жылдық жобаны жүзеге асыруға 4 млрд. теңге бөлінді. Сарапшылардың пікірінше, жоба жол саласындағы «жасыл» технологияларды дамытуға қуатты серпін беруі мүмкін. «ҚазАвтоЖол» ҰК» АҚ мәліметі бойынша бүгінде Қазақстанда шамамен 97 пайыз жол жабындысы қанағаттанарлық жағдайда. Өткен жылы республикалық маңызы бар 3600 шақырым жол жөнделіп, жалпы 5 млн. тоннаға жуық асфальт-бетон төселді. Ал оның сапасы сұрақ туғызады.
Жол активтерінің сапасы ұлттық орталығының бөлім басшысы Елдар Әбенов: «Былтыр біз 11 мыңнан астам нысанды тексердік. Олардың 4 мыңында ақаулар анықталды. Негізінен, аудандық және облыстық маңызы бар жолдарда. Сондай-ақ, біз 8 техникалық бақылаушыға аттестат бермедік. Жыл қорытындысы бойынша 55 млн. теңгеден астам сомаға айыппұл салынды», – дейді.
Биыл «Қазавтожол» ҰК» АҚ 3 мың шақырымнан астам жолды қайта жөндеуді жоспарлап отыр. Сонымен бірге 10-ға жуық учаскені ретке келтіруге уәде берілді.
Айгүл Байбосынова
Фото: rk.gov.ru
