Мемлекет басшысының тапсырмасына сәйкес Үкімет халықтың көші-қоны саласындағы 2023-2027 жылдарға арналған саясатын қайта қарады. Алдағы бес жылға арналған жаңа тұжырымдама қабылданды, ол 7 бағыт бойынша іске асырылады. ҚР Еңбек және халықты әлеуметтік қорғау министрлігі Көші-қон комитетінің төрағасы Асқарбек Ертаев Орталық коммуникациялар қызметінің алаңында бұл құжаттың мән-жайын айқындады.
Бизнес иммиграция аталмыш тұжырымдаманың негізгі бағыттарының бірі болып табылады. Әлемде инвестициялар үшін бәсекелестіктің күшеюі аясында елдегі бизнес иммиграцияны одан әрі дамыту бойынша жұмыстар жүргізіліп жатыр. Этникалық қазақтарды «Ата жолы» картасына тарту бойынша шаралар қолға алынды. Осы картаны алуға үміткерлердің географиясы кеңейіп келеді.
«Бүгінгі таңда Ресей Федерациясы, Моңғолия сияқты таяу шет елдермен қатар, «Ата жолы» картасын алуға АҚШ, Еуропалық Одақ елдерінің азаматтары – этникалық қазақтар да қызығушылық танытуда. Естеріңізге сала кетсек, «Ата жолы» картасы өз елдерінде сұранысқа ие кәсіптері бар немесе табысты бизнес-кейстерді іске асырған және оларды Қазақстанда кеңінен қолдануға ниет білдірген этникалық қазақтарға беріледі. Бүгінгі күні «Ата жолы» картасы 44 этникалық қазақ отбасына берілді. Оның ішінде сұранысқа ие мамандықтары бар 24 адам және 20 адам кәсіпкер», — деді спикер.
Еңбек иммиграциясы бағыты бойынша шетелдік жұмыс күшін тартуға биыл 22 мың квота белгіленді. 2023 жылы коммерциялық секторда шетелдік жұмыс күшін тартуға 14 мыңға жуық рұқсат берілді. 296 мың рұқсат еңбекші мигранттарға жеке тұлғалардың үйінде жұмыс істеуі үшін берілді.
Білімді трансферттеу және қазақстандық қызметкерлердің біліктілігін арттыру мақсатында шетелдік мамандарды тарту бойынша бірқатар кешенді шаралар қабылдануда.
«Мысалы, сұранысқа ие мамандықтары бар шетелдіктер үшін визалар мен тұруға ықтиярхат алудың жеңілдетілген тәртібі енгізілді. Корпоративішілік ауыстыру шеңберінде шетелдік жұмыс күшін тарту кезінде жұмыс берушінің ішкі нарықта кадрлар іздеуді жүргізу шарттары қайта қаралды.Қолданысын елдің бірнеше өңірлеріне тарата отырып, шетелдік жұмыс күшін тартуға бір рұқсат алу мүмкіндігі берілді», – деді А.Ертаев.
Келесі бағыт этникалық көші-қонды реттеуге қатысты. Айта кетерлігі, жыл басынан бері елге барлығы 21 325 қандас келді. Жылдан жылға келіп жатқан қандастардың саны артуда.
«Бүгінгі таңда құжаттарды қабылдау шет елдердегі мекемелер немесе «Е-қонақ» мобильді қосымшасы арқылы жүзеге асырылады. Шет елдердегі мекемелер ағымдағы жылдың шілде айынан бастап «бір терезе» қағидаты бойынша жұмыс істейді. «Қандас» автоматтандырылған ақпараттық жүйесіне 42 елшілік пен консулдық мекеме қосылған. Бұған қосымша өткен жылдың қазан айынан бастап «Е-қонақ» мобильді қосымшасы арқылы қандас мәртебесін беруге өтініш беру қызметі іске қосылды», – деді Көші-қон комитетінің төрағасы.
Бұл жаңашылдық өтініштерді қарау процесін жеңілдетуге мүмкіндік берді.
Фото: Neonomad-тен алынды
