Жаркент өңірінің малшы қауымына қыс қырын мінез танытып тұр. Өңірге қыс қаһары әдеттегіден ерте келді. Желтоқсан айының алғашқы күнінен бастап апта бойы жауған қар аязды күндерге ұласты. Қаңтар айы да ызғардан арыла қойған жоқ.
Қыстан қарауындағы малын жүдетпей, шығынсыз шығару үшін шаруалар табиғи жайылымдарды барынша тиімді пайдаланып, қолдағы жемшөп қорын да үнемдеу жолын қарастыруда. Ауданда қыс пен көктемгі мал төлдету науқанына жалпы 203,4 мың тонна көпжылдық және табиғи шөп, 23 мың 600 тонна жоңышқа, 28,3 мың тонна сүрлем, 35,1 мың тонна сабан, 15,7 мың тонна пішендеме және 52 мың тонна жүгері жемі дайындалған. Өңірде жалпы 470 мал қыстауы бар. Ауданда әзірленген мал азығының 80 пайызы сол қыстауларға жеткізілген.
Ауданда соңғы жылдары төрт түлік саны еселеп өсті. Бүгінгі таңда аудан бойынша 152061 бас қой, ешкі, 47833 бас ірі қара мал, 14 мыңнан астам жылқы және 350 түйе қыстатылуда.
Осы орайда соңғы жылдар ауқымында асыл тұқымды мал өсіретін шаруа қожалықтарының саны 10-нан 34-ке дейін көбейген. Өткен жылы Лесновка ауылында Нұрдәулет Найманбаев 100 асыл тұқымды қалмақ сыйырын, Басқұншы ауылдық округінде Бақыт Жақыпбеков 58 «Сементал» асыл тұқымды құнажын сатып алып, қазір өз төлі есебінен көбейтуде. «КөкталАгро» ЖШС 1150 сауын сиырға лайықталған сүт фермасын салып, іске қосқанына екі жылдан асты. Қазір мұнда Австралиядан Швед тұқымды жалпы 473 құнажын әкелініп, соның бұзаулағаны 245-і сауылып, күн сайын 6 тонна сүт Талдықорғандағы сүт өңдеу зауытына жөнелтілуде. Осындай ілкімді істі «Ернар» жеке шаруа қожалығы да атқарып келеді. Мұнда ағылшын тұқымды 523 «Jersi» сүтті сиыры бапталуда. Оның 250-ден астамы сауылып, аптасына 8 тоннадан астам сүт өткізуде.
Мал шаруашылығындағы алда тұрған тағы бір маңызды мәселе – көктемгі мал төлдету науқаны. Күзде Жаркент өңірінде 130 мыңнан астам саулық асыл тұқымды қошқарлардан алынған ұрықпен қолдан қашырылды. Бұл саулықтар наурыз айында төлдейді.
Жазиралы Жаркент өңірінде биылғы қыстан барша мал шелді шығарына мамандар мен малшылар сенімді. «Шелді мал – төлді мал» демекші, шаруақор жұрт тілегінің жүзеге асарына сенімді. Ләйім солай болғай. Өйткені бұл да ел ырысын еселер береке бастауы.
Мырзағали Нұрсейіт
Панфилов ауданы
Фото: kt.kz
