Талдықорғандағы Достық үйі ғимаратында «Электронды сауда саласындағы тұтынушылардың құқықтарын қорғау» атты «дөңгелек үстел» отырысы өтті.
Жиынға сауда және тұтынушылар құқықтарын қорғау департаменті басшысының міндетін атқарушы Айдос Дауашев, облыстық мемлекеттік кірістер департаменті басшысының міндетін атқарушы Дәурен Нұрғожаев, облыстық мемлекеттік кірістер департаменті камералдық мониторинг басқармасының басшысы Ғалия Самурзинова және облыстық полиция департаментінің тергеу басқармасы бастығы Нұрболат Шаму қатысып, тұтынушылардың құқықтарын қорғау және заңнамалық бастамалар бөлігінде электрондық сауданың жай-күйін сөз етті.
Қазір «Instagram», «Facebook» әлеуметтік желілері және басқа да платформаларда сауда жасаумен қатар ақпараттық-телекоммуникациялық желіде тұтыну тауарларын сату және түрлі қызметтер көрсету индустриясы өте қарқынды дамып келеді. Оның ішінде әрбір тұтынушы қандай да бір дәрежеде электрондық платформада Wildberries пен Kaspi-ді пайдаланады.
Электрондық алаңдағы сауданың ұлғаюымен қатар тұтынушылардың элек- трондық сауда алаңдарына шағымдары өскен. Мысалы, былтыр тұтынушылардың құқықтарын қорғау комитеті өтініштердің рекордтық санын қарастырды. 50 мыңнан астам қазақстандық әділдік іздесе, 8 мыңы онлайн-саудагерлердің алдап-арбауына тап болған. Мұндай жағдайдың 55 пайызы алаяқтық ретінде анықталған. 2022-2023 жылдары Жетісу облысының сауда және тұтынушылар құқықтарын қорғау департаментіне түскен 71 өтініштің 27-сі оңды шешіліп, тұтынушыларға 1 млн. 392 мың теңге қайтарылды.
«Дөңгелек үстелде» мамандар алаяқтарға алданып қалмау үшін түрлі кеңес айтып, алданбаудың жолдарын көрсетті.
А. ӘБІЛТАЙҚЫЗЫ
Фото: abai.kz
