Жетісу облысының прокуратурасы әкімдік қызметкерлерін рұқсат етілмеген жердегі қоқыс үшін жауапкершілікке тартты, — деп хабарлайды Tengrinews.kz .
Облыс аумағында рұқсат құжаттары жоқ 37 қоқыс полигондары жұмыс істеген. Осылайша Текелі және Талдықорған қалаларында, сондай-ақ Ескелді, Көксу және Қаратал аудандарында қоршаған ортаға зиян келтірілген.
«Бұған дейін экология департаменті жергілікті атқарушы органдардың назарын осы заңбұзушылықтарға аударған. Алайда олар шара қабылдамағандықтан табиғатты қорғау прокуратурасына араласуға тура келді», — делінген хабарламада.
Прокуратураның қадағалау актісі бойынша аудан әкімінің 3 орынбасары және аудан әкімдігінің 1 бөлім басшысы ӘҚБтК-нің 344-бабы («экологиялық талаптарды бұзу») бойынша жалпы сомасы 1 миллион теңгеден астам айыппұл салынып, әкімшілік жауапкершілікке тартылды.
Жергілікті атқарушы органдар рұқсат етілмеген қоқыс орындарын жоюға кірісті.
Фото: Жетісу облысының прокуратурасы
