Мемлекет басшысы кезекті Жолдауында халықтың тұрмыс сапасына тікелей әсер еткен шараларды атай отырып, алда атқарылатын істердің де мол екенін, соның ішінде жаңа жылдан бастап балалардың есепшотына қаражат түсе бастайтынын айтты, деп хабарлайды 7-su.kz желілік басылымы.
Мемлекет басшысы әуелі істеліп жатқан игі істерге тоқталды.
«Осы орайда халықтың тұрмыс сапасына тікелей әсер еткен кейбір шараларды атап өткім келеді. Мысалы, 2020 жылдан бері мұғалімдердің жалақысы екі есе өсті. Дәрігерлердің айлығы да айтарлықтай көбейді. Қазір олардың табысы еліміздегі орташа жалақыдан әлдеқайда жоғары. Жұртқа зейнетақы жинағының бір бөлігін пайдалану мүмкіндігі берілді. Миллионға жуық адам осы жобаның игілігін көрді – тұрғын үй мәселесін шешіп, баспаналы болды», — деді Мемлекет басшысы.
Бұл ретте Президент бұл нәтижелер нақты іске асқан шаралардың бір бөлігі екенін ескертті.
«Қазір ауылдық жерде 300-ден астам денсаулық сақтау нысаны салынып жатыр. «Ұлттық қор – балаларға» жобасы қолға алынды. Соның арқасында жаңа жылдан бастап балалардың есепшотына қаражат түсе бастайды. Игерілмей жатқан немесе заңсыз берілген 8 миллион гектар жер мемлекет меншігіне қайтарылды. Мен нақты іске асқан шаралардың бір бөлігін ғана атап өттім. Шын мәнінде, көп жұмыс атқарылды, болашақта да өз жалғасын табады», — деді Қасым-Жомарт Тоқаев.
