Конституция күніне Жетісу облысында 220 орынды мәдениет үйі қайта жаңғыртудан кейін есігін айқара ашты. Кербұлақ ауданы Жоламан ауылының тұрғындары осылайша қос қуанышты қатар атап өтті. Ауылдағы 1962 жылы салынған бұл мәдениет үйі әбден тозығы жетіп, 1990 жылдардан бері қаңырап бос тұрған еді, енді жаңа кейіпке еніп, халықтың игілігіне берілді, — деп хабарлайды Жетісу облысы әкімінің баспасөз қызметі.
Тұрғындарды Конституция күнімен құттықтаған аудан әкімі Қанат Есболатов жаңарған мәдениет нысанының жұмысы жастардың мәдени-ағарту тәрбиесіне оң ықпал етіп, мерекелерде халықты біріктіретінін айтты.
Жалпы Кербұлақ аудандық әкімдігінің мәліметінше, мәдениет үйін қайта жаңғыртуға 468 млн. теңге бөлінген. Құрылыс жұмыстарын «ГрадСтройСервис» ЖШС биылғы жылдың көктемінде бастаған болатын. Нысан барлық қажетті құралдармен жабдықталған. Мұнда 220 орындық зал, 11 400 кітап қоры бар кітапхана бар. Ғимараттың маңайы абаттандырылып, 30-дан астам жеміс ағашы мен гүлдер отырғызылмақ.
