Әлеуметтік желілерде екі бөліктен тұратын ролик тарады. Біріншісінде бір топ кісі жерде жатқан ер адамдарды ұрып жатыр, ал екіншісінде контейнерде мұздың арасында жатқан баланың денесінің жанында жылап отырған әйел көрсетілген.
Stopfake.kz тез таралған бейне жазбалардың шын-өтірігін анықтап көрді, деп хабарлайды 7-su.kz желілік басылымы.
Таралған ақпарат дерегінше, тепкінің астында қалған ерлер балалар органдарын сататын банданың мүшелері, ал бала – олар сату мақсатында тасымалдамақ болған денелердің бірі екен.
Ал Stopfake.kz мұның бәрі 2018 жылдан бері әртүрлі мағынада желіде тараған ескі фейк екенін айтады.
Видеоның екі бөлігін де толық қарастырайық. Біріншісінде жерде жылы киіммен жатқан екі адам көрсетілген. Оларды басқа адамдар тепкілеп жатыр. Олардың кім екендігі және оларды нақты не үшін ұрып жатқаны белгісіз. JawaPos.com индонезиялық жаңалықтар порталының хабарлауынша, роликтің кейіпкерлері алаяқтық пен сапасыз тауарларды сатқаны үшін осындай жазаға тартылған.
Баланың денесінің жанында жылап отырған әйелдің видеосы Желіде кеңірек таралған. Оны алғаш рет 2017 жылдың шілдесінде қытайлық қолданушы жариялаған. Шын мәнінде, бұл бала туыстарына қонаққа барып, суға батып кеткен. Оның денесін жерлеу үшін туған қаласына жеткізу мақсатында мұз салынған контейнерге салған.
Сондай-ақ органдарды трансплантациялау күрделі және мұқият реттелетін процесс екенін ескерген жөн. Денесі мұздатылған қайтыс болған донордан мүшені трансплантациялау мүмкін емес. Адам қайтыс болғаннан кейінгі донорлықты пациенттің миы істен шыққан соң, бірақ жүрегі соғып тұрса ғана ғана жасауға болады.
Осылайша, таралған роликте органдарға сату мақсатында балаларды ұрлау әрекеті көрсетілмеген. Бұл бір-бірімен байланысты емес екі түрлі видео. Біріншісі алаяқтарды жазалау, екіншісі суға батып кеткен баланың денесін тасымалдау туралы.
Фото: elements.envato.com
