ХХІ ғасыр ұрпақтары, яғни біздің толқын саналатын жасөспірімдер көзбе-көз, жүзбе-жүз қарым-қатынасқа қарағанда бір-бірімен желіде әңгіме-дүкен құрғанды қалаймыз. Сөйтіп, замана легімен смартфон иелігіне тәуелді болып барамыз. Технология қолжетімді болғандықтан әлеуметтік желілерге сұраныс көбейіп, оны қолданушылар саны да артуда.
Жалпы адамдар әлеуметтік желіге түрлі ақпарат алу үшін немесе өз жазбаларын салу үшін кіреді. Технология қарқынды дамыған дәуірде facebook, Instagram, TikТok, Whatsap, тағы басқа желілер тек уақыт өткізетін ғана емес, білім алуға да қолайлы, кәсіп жүргізуге де тиімді және жан-жақты жарнама беретін ортаға айналды. Сонымен бірге, жаңалықтардың жақсысын да, жаманын да дәл осы әлемді алақандағыдай көрсететін алаңнан кездестіруге болады.
Таңертең көзін тырнап ашқаннан смартфонды қолына алатын адамдар түрлі пікір қалдырып, лайк басу арқылы ақпарат таратушылардың қажеттілігін арттыруда. Осы тұста жаңа мамандықтар пайда болды. Олар блогер, инфлюенсер және стримерлер деп аталды.
Мысал ретінде қарастырсақ, қазіргі таңда ауқымы ең үлкен әлеуметтік желі ол – TikТok. Бастапқыда адамдарды тарту үшін қызықты және қарапайым контентпен басталған бұл әлеуметтік желі бүгінгі күні жарнама үшін ең ауқымды алаң болып тұр. Өзім де TikTok желісін белсенді пайдаланушылардың бірімін. Карантин кезінде уақыт өткізу мақсатында тіркелгеніммен кейіннен бұл әлеуметтік желінің адамның жасына, жынысына ешқандай шектеу қоймай тек қызықты «кейіпкер» болуды талап ететінін байқадым. Сонымен бірге бұл желіОЙМАҚТАЙ ОЙ ЖӘРМЕҢКЕ де табыс табуға болатынын біліп, еңбектене бастадым.
Екі жыл осы жолда тынымсыз жұмыс істеп, үздік трендтегі видеоларды түсірдім. Жүрген жерімде әлеуметтік желідегі парақшама тіркелуді сұрап отырдым. Ондағы басты мақсатым – өзімді тек желі қолданушысы емес, блогер-инфлюенсер ретінде қалыптастырып, желіде қаражат табу еді. Қазіргі кезде көп адам әлеуметтік желіде жай уақыт өткізу үшін отырмайды. Бірі – ақпарат алуды қажет етсе, бірі – ақша табу көзін іздейді. Ал менің әлеуметтік желімен қызығушылығым болашақ мамандығымды таңдауға көмектеседі деп ойлаймын. Әлеуметтік желіде нақты дерек көзіне сүйенбей жалған ақпарат таратып немесе басқа да қоғамға керексіз ойларын ортаға салып, өздерін блогерміз дейтіндер де бар. Менің ойымша, білімді блогерді «заманауи журналист» деп айтуға болады. Кәсіби журналистен айырмашылығы – осы саланың заңдылықтарын теория жүзінде 4 жыл оқымағаны. Өзім блогер болу арманымнан әлі де бас тартпадым. Бірақ сапалы мәліметті халыққа жеткізу үшін ауызекі сөзді пайдаланбай әдеби тілде жеткізуді мақсат етіп келемін. Күнделікті өмірде болып жатқан жаңалықтармен ғана бөлісіп қоймай журналистік зерттеулер жүргізіп, деректі материалдар түсіріп, мобилография саласын да меңгергім келеді. Қазіргі уақытта кәсіби журналиске мұның бәрі қажет деп есептеймін.
Заман талабына сай уақыт өзгереді, жылдар ауысады, яғни тенденция басқа жаққа қарай дамуы мүмкін. Ал төртінші билік журналистер қоғамы әрдайым халыққа керек болады. Сондықтан осы бағытымнан айнымай, мақсатыма жету жолында терең білім алып, ізденісімді тоқтатпай, алға жылжи бермекпін.
Махаббат САТТЫБЕКОВА,
С. Морозов атындағы №51 орта мектеп-гимназиясының оқушысы
Үштөбе қаласы
