Кез келген мемлекеттің не қаланың дәулетін сәулеті айшықтайды. Сәулет өнері дамыған, өрістеген жерде құрылыс жұмыстары қарқынды жүреді. Әрі сәні мен сәулеті де келісіп тұрады. Бұл – мойындалған аксиома.
Жетісу өңірінің де әл-ауқатын құрылысы айқындап тұр. Облыс аумағында 370 нысанның құрылысы жүргізілуде. Оның дені әлеуметтік салаға негізделген. Сонымен қатар, осы жылы 321,9 шаршы метр тұрғын үй пайдалануға беріледі деп күтілуде. Айта берсек, ауыз толтыратын сөз жетеді. Ал осынша құрылысты сапалы һәм уақытында өткізу құрылысшылардың құзыретінде. Күннің аптабы мен суығына қарамай өңірді сәулеттендіре түскен құрылысшылардың еңбегін құрметтеуде облыс басшылығы қамсыз емес екен. Тамыз айының екінші жексенбісіне орайластырылған Құрылысшылар күнінде жетісулық құрылысшыларды облыс әкімінің орынбасары Әлібек Жақанбаев құттықтап, ізгі ілтипатын жеткізді.
Салтанат сарайында өткен мереке мезіретінде Ә. Жақанбаев құрылыс саласындағы ауқымды жұмыстардың тиегін ағытты. Айтуынша, өңірдегі биылғы құрылыс жұмыстарына 49,4 млрд. теңге қарастырылыпты. Нәтижесінде облыс аумағында білім саласы бойынша 17, денсаулық саласы бойынша 7, тұрғын үй бойынша 281 нысанның құрылысы жүргізілуде. Осынша нысанның іргесі бүтін, қабырғасы мығым болуына құрылысшылар жауапты. Ал жауапты қызметте табиғаттың сан түрлі мінезіне қарамай маңдай терін сылып жүрген мамандар әрдайым құрметке лайық.
– Құрылыс – адамзат баласымен бірге келе жатқан жасампаз кәсіп. Бүгінде өңірімізде құрылыс саласы қарқынды дамып, ел экономикасының, оның ішінде тұрғындардың әлеуметтік жағдайының артуына айрықша ықпал етіп келеді. Ауқымды саланы алға жылжытуда құрылысшылардың еңбегі ерен. Әсем де көрікті, түрлі заманауи нысандардың бой түзеуі – құрылысшылар легінің мезгілдің ыстық-суығын елемей, күнтүн демей атқарған игі істерінің жемісі. Қандай кезең болмасын құрылыс саласы өз жұмысын тоқтатпай, ел игілігін еселеуде. Қазіргі күні мемлекетіміз күн сайын көркейіп, абаттанып келеді. Төрткүл әлеммен терезесін теңестірген елімізде көрікті ғимараттар бой көтеріп, еңбекқор жандардың арқасында әлемге танылды, – деді облыс әкімінің орынбасары.
Шара барысында еңбегімен дараланған сала майталмандары облыс басшысының Құрмет грамотасымен, Алғыс хатымен марапатталса, өз кезегінде кей сала еңбеккерлері ҚР Индустрия және инфрақұрылымдық даму министрлігінің құрылыс және тұрғын үй-коммуналдық шаруашылық істері комитетінің алғысына бөленді.
Дастанбек САДЫҚ
