Еліміздегі балабақшалардың 69%-ы мемлекеттік тілде білім береді. Бұл туралы Оқу-ағарту министрлігі ерте жастағы балаларды дамыту институтының директоры Манара Адамова орталық коммуникация қызметінде өткен брифингте мәлімдеді, деп хабарлайды Halyq Uni.
Брифингте журналистер министрлік өкілінен «бұған дейін оқу-ағарту министрі Ғани Бейсембаев қазақ балабақшаларын көбейтеміз, мемлекеттік балабақшалар мемлекеттік тілде тәрбие берумен айналысады деп айтты. Осы бағытта жұмыс қалай жүріп жатыр? Мемлекеттік балабақшаға барған бала қашаннан бастап толық 100% мемлекеттік тілде білім алады?» деп сұрады.
Балабақшалардың 69%-ы мемлекеттік тілде тәрбиелеп, білім береді. 2 жыл бұрын мемлекеттік тілде тәрбиеленетін балалардың үлесі 65% болған. Сондықтан қазір бұл бағытта жұмыс жүргізіліп жатыр. 2022-2023 оқу жылында қабылданған негізгі нормативті құжаттардың негізінде бағдарламаға қосымша сөздік әзірленген. Бұл сөздікті педагогтердің, балабақшадағы барлық қызметкердің баламен сөйлескен кезде қолдануы арқылы баланың сөздік қорын қалыптастыруға бағытталған, — деді Манара Адамова.
Айтуынша, жаңадан ашылып жатқан балабақшалардағы топтардың барлығының қазақ тілінде тәрбие алуына назар аударылып отыр.
100% (қазақ тілінде) дегеннің артында әрбір баланың тағдыры мен әрбір ата-ананың сұранысы бар. Ол бір күнде іске асырылмайды. Келешекте ата-аналардың тарапынан қай тілде баласына тәрбие беру қажет деген сұранысына қарай кезең-кезеңімен жүзеге асырылады.
Бұл бағытта жұмыс жалғасып жатыр. 100%-ға жететін уақыт та келеді. Алдағы 3 жыл, 5 жыл бола ма – барлығы уақыттың еншісінде. Қоғамның дайындығы, ата-аналардың дайындығына байланысты. Себебі қазір басқа тілде тәрбиелейтін балабақшаға барып жатқан балаға да, ата-анаға да психологиялық стресс болады. Ол бүгін жауып тастайтын нәрсе емес. Бәрі кезең-кезеңімен жүзеге асады, — деді Ерте жастағы балаларды дамыту институтының директоры.
Айта кетейік, республика бойынша 11 320 мектепке дейінгі ұйым бар. Жыл басынан бері 29 620 балаға арналған 307 мектепке дейінгі ұйым ашылды.
Фото: Орталық коммуникациялар қызметі
