Алакөл ауданына жұмыс сапарымен барған облыс әкімі Бейбіт ИСАБАЕВ өңірдің тыныс-тіршілігімен танысып, тұрғындарды жеке мәселелері бойынша қабылдады. Артынша халықпен кездесіп, елдің әлеуметтік жағдайын жақсарту бағытында атқарылып жатқан шаруаларды толықтай баяндады. Сонымен қатар, аудан жұртшылығын толғандырған сауалдарға жауап берді.
Ауданда 5 мыңнан астам шағын және орта кәсіпкерлік нысаны тіркелген. Оларда 10 мың адам жұмыс істейді. Биылғы бірінші жартыжылдықтың қорытындысы бойынша кәсіпкерлік нысандарынан мемлекеттік бюджетке 1,1 млрд. теңге салық түскен. Халқының саны 75,2 мың адамға жеткен Алакөл ауданының әкімдігіне бұл бағыттағы жұмысты әлі де пысықтап, шағын және орта кәсіпкерлікті дамыту үшін жан-жақты жағдай жасау керегін ескерткен облыс әкімі өңірдегі мемлекеттік бағдарламалардың орындалу барысын салмақтады
– Жыл басынан кәсіпкерлікті дамыту жөніндегі ұлттық жоба шеңберінде ауданда жалпы сомасы 3,7 миллиард теңгеге 26 жоба мақұлданды. Ал «Ауыл Аманаты» бағдарламасы аясында Алакөл ауданынан 251,9 миллион теңгеге 34 өтінім түсті. Оның 31-і немесе 91 пайызы мал шаруашылығын дамытуға берілген. Бағдарламаның басты бес бағытын ескерсек, ауданның туризм, шегара маңында кәсіпкерлікті, әсіресе қызмет көрсету саласын дамытуға мүмкіндігі бола тұра бұл бағыттарда өтінімдер ұсынылған жоқ, – деген Бейбіт Өксікбайұлы аудан әкіміне міндет жүктеді. – Сондықтан, аудан әкіміне, халық арасында түсіндіру жұмыстарын кеңінен жүргізіп, бағдарламаның барлық бағыттары бойынша қатысу деңгейін көтеруді тапсырамын.
Ауданда «Ауыл – ел бесігі» арнайы жобасы аясында 2,2 млрд. теңгеге 9 жоба іске асырылуда. Бүгінде Бескөл ауылында 80 орынды спорт кешенін салу жобасы аяқталып, Ақжар ауылындағы 150 орынды ауылдық клуб салу және мектеп ғимаратын күрделі жөндеу сынды екі жоба жүргізіліп жатыр. Қазақстан, Ақжар-2, Қарлығаш, Қабанбай ауылдарында 5 кентішілік жолдар және Екпінді ауылындағы көпірді жөндеу жұмыстары бойынша мемлекеттік сатып алу рәсімдері кеш жүргізілуде. Осы орайда, аудан әкімі жоспарланған нысандарды пайдалануға беруді уақытылы қамтамасыз ету үшін жұмыстарды тікелей өзіңіздің қадағалауыңызда ұстаңыз.
Осылай деген облыс әкімі туризм саласы аудан экономикасының дамуында ерекше орын алатын Алакөлдің мүмкіндігіне тоқталып, биыл шипа сулы көлге 1,5 миллион адам демалуға келеді деп күтіліп отырғанын, Ақши және Көктұма ауылдарында уақытша өрт сөндіру бекеттері құрылып, қосымша 7 полиция қызметкері жұмылдырылғанын, Ақши ауылында медициналық пункт қызмет көрсете бастағанын атап өтті. Сондай-ақ, көл жағасында кәрізтазарту желісінің құрылысын жүргізу жұмыстары келесі жылы басталатынын, Ақши ауылына 67,4 шақырым электр желілерін қайта жаңарту және салу жүргізілетінін, соған сай көл жағалауын электр қуатымен қамтамасыз ету жұмыстары толық жүретінін алға тартқан Бейбіт Өксікбайұлы жергілікті жұртшылықты сапалы ауызсумен қамту мәселесіне тоқталып, аудандағы 46 елді мекен орталықтандырылған сумен қамтамасыз етілгенін, сумен жабдықтау желілерін қайта жаңарту және салу жұмысын жалғастыру үшін 10 жобалық-сметалық құжаттаманы әзірлеуге 144 миллион теңге бөлінгенін атап өтті. Соған орай биыл Бибақан, Екпінді, Үшбұлақ, Тоқжайлау ауылдарында құрылыс-монтаждау жұмыстарын бастауға республикалық бюджеттен 1,3 миллиард теңге бөлініп, Көктұма ауылын сумен жабдықтау желілерін қайта жаңарту және салуға 1 миллиард теңгенің бюджеттік өтінімі республикалық бюджеттен қолдау тапқанын жеткізген баяндамашы Лепсі, Бұлақты, Қоңыр, Теректі ауылдарын таза ауызсумен қамтамасыз етудің жобалық-сметалық құжаттамасы әзірленіп жатқанын алға тартты. Осы жобалар толық іске асқанда 2026 жылға Алакөл ауданының елді мекендерін орталықтандырылған сумен қамтамасыз ету деңгейі 92,8 пайызға жетеді.
Айдар ҚАЛИЕВ
