Мүгедектігі бар адамдар үшін әлеуметтік қорғаудың тиімді жүйесін жасау – мемлекеттің әлеуметтік саясатының басым бағыттарының бірі. Біз осылай көңілімізді жұбатқанымызбен жыл санап кембағал балалардың көбейіп келе жатқаны жанымызға батады. Шындығында қазір түрлі ауруға шалдығып туатын нәресте көп. Оларға қойылатын диагноздың түрі де артуда.
Мәселен, аутизммен ауыратын балалар жиілеп кетті. Сондай-ақ, психоневрологиялық патологиялары бар мүгедек балалар мен тірек-қимыл аппараты бұзылған, «даун» кеселіне шалдыққандар қатары көбеюде. Әрине, тағдырдың басқа салғаны дейміз. Қалай болғанда да бұл соңғы уақытта назар аударатын жайтқа айналды.
Жалпы Талдықорған қаласында 6976 мүгедектігі бар азамат тіркелген. Оның ішінде 18 жасқа дейінгі балалар – 901. Ерекше күтімді қажет ететін 18 жасқа дейінгі 317 балаға арнаулы әлеуметтік қызмет өз деңгейінде көрсетілуде. «Аутизм және басқа да менталды бұзылулары бар күндізгі болу орталығында» 62, «Бәйтерек» күндізгі болу орталығында 86 бала, «Ақбота» ҚБ күндізгі болу орталығында 20 бала, «Қамқор» арнаулы әлеуметтік қызмет көрсету орталығында – 34, үй жағдайында 120 бала бар. Балалар күндізгі болу орталықтарында кәмелетке т о л ғ а н ш а а р н а у л ы көмек ала алады. 18 жастанасқан мүгедектігі бар азаматтарға жартылай стационарлық қызмет көрсететін орталықтың болмауына байланысты ата аналар тарапынан орталық ашу туралы өтініш көптеп түсуде.
Осы орайда бірнеше ата-ананың атынан бір ғана мүмкіндігі шектеулі бала тәрбиелеуші Е. Тәңірбергенованың облыс әкіміне жазған өтінішін жариялауды жөн санадық.
– Мүмкіндігі шектеулі балалардың ата-аналары ретінде қалыптасқан мәселенің шешілуіне ықпал етуіңізді сұраймыз. Атап айтқанда, 18 жасқа толған балаларымыз мүгедектердің ересек санатына ауысып, әрі карай күндізгі бейімделу орталығына барғанда көппен қарым-қатынас жасауы мүлдем тоқтатылады. Балаларымыздың даму қабілеттілігі, қоршаған ортамен байланысы, тұрмыстық әл-ауқаты төмендейді. Сонымен катар, мүмкіндігі шектеулі балалардың ата-аналары жұмысқа шыға алмай үйде отыруға мәжбүр. Бұл – мәселенің маңызды бөлігі. Егер бұрын оларды балалар орталықтарына табыстап, калыпты зейнетақыға үміттеніп еңбектенген болса, 18 жасқа толғаннан кейін балаларының карапайым жәрдемақысынан басқа табыс тауып, жұмыс істеуіне мүмкіндіктері шектеледі. Сондықтан, біз үлкен үмітпен Сізден, 18 жастан жоғары балаларға арналған күндізгі болу орталығының ашылуына ықпал етуіңізді сұраймыз, – деп өтінішін жеткізген.
Бейбіт Өксікбайұлы өтініш білдірген ата-аналардың ұсынысын дереу шешуді қолға алып, облыстық жұмыспен қамтуды үйлестіру және әлеуметтік бағдарламалар басқармасы басшысының міндетін атқарушы Ермек Мизамбаевқа мәселені дереу шешуді тапсырды.
Осы орайдағы жұмыстар шұғыл қолға алынып, қазіргі уақытта арнайы орын белгіленді. Дәл қазіргі уақытта керекті құрал-жабдықтар мен арнайы орынның іші әзірленіп жатыр. Сәтін салса 30 адамға арналған арнайы орталық қаңтар айынан жұмысын бастайды.
