Ел аумағына әкелінген шетелдік көлік құралдарын заңдастыру мәселесі өз мәресіне жетті. Бұл туралы журналистермен өткізілген брифингте Жетісу облысы полиция департаментінің әкімшілік полиция басқармасы бастығының міндетін атқарушы Диас Айнақұлов айтты.
Брифингте бүгінде облыста шетелдік автокөліктердің қаншасының заңдастырылғаны белгілі болды. Өздеріңізге белгілі, Мемлекет басшысы елімізге өткен жылдың 1 қыркүйек айына дейін әкелінген және ҚР заңнамасына сәйкес мемлекеттік тіркеуден өтпеген шетелдік автокөліктерді бір жолғы заңдастырудан өткізу туралы жариялаған болатын. Осы тапсырманы орындау мақсатында қажетті заңнамаға өзгерістер енгізілді. Бүгінгі таңда Жетісу аумағында 1205 көлік құралы тіркелген (уақытша тіркеуде тұрған көлік-32, Армения – 33, Ресей – 367, Қырғызстан – 385, Беларусь – 1, Грузия – 38, Корея – 1, Дубай – 3, Моңғолия – 2).
Кәдеге жарату алымының күшін жою (утиль алымы) 12 қаңтардан бастап қолданысқа енгізілді. Биылғы мамыр айының 22 жұлдызынан бастап қосалқы бөлшек ретінде әкелінген автокөліктерді тіркеу басталды. Бүгінге дейін қосалқы бөлшек (автоконструктор) ретінде әкелінген 236 көлік тіркелді. 1 шілдеге дейін өтініш берген Қазақстанның барлық азаматына көрсетілген мерзімнен кейін автокөліктерді заңдастыру құқығы берілді.
Сондай-ақ, брифингте заңдастырылмаған көлік иесіне уақытша тіркеуге қанша уақыт беріледі және қандай көліктер тіркелетіні айтылды. Белгілі болғандай, осы бойынша қазір кезекте тұрған азамат көп. Сондықтан олардың 1 шілдеден кейін еш уайымсыз тапсыруға мүмкіндігі бар.
Өйткені ҚР Үкімет қаулысына легализация бойынша өзгерістер енгізілді. Ол Еуразиялық экономикалық одақ елдерінде бұрын тіркелген жері бойынша есептен шығарылмаған және осы себепті заңдастырылмаған автокөліктерге қатысты аталған көлік иелеріне оларды уақытша тіркеуге ҚР 5 жыл мерзімге қою құқығы беріледі.
Соңында Диас Жұмабекұлы журналистердің сұрақтарына жауап берді.
Айгүл Байжұмақызы
Фото: ашық дереккөзден
