«Жетісудың» кейінгі 2 ойыны жөнінде айтылар сөз көп. Нәтижесі жанкүйерлердің де көңіл-күйін түсіріп, бапкер тарапына сын айтылды. Оны да көрдік. Өткелде ат ауыстырған «Жетісудың» нәтижесі де Алмас Құлшынбаев кеткеннен кейін шатқайақтап қалғандай. Бапкерлікке келген Асқар Қожабергенов әлі команданы танып-түсінбей жатыр деген де пікір бар.
Қожабергенов алғашқы ойынында «Оқжетпесті» 1:0 есебімен жеңген. Жанкүйерлердің көпшілігі кездейсоқтық деп қабылдады. Алаңға барып, теледидардан телміре көргендер ойын бойы доп көкшетаулықтардың иелігінде болғанын, қауіпті сәттерді қарсыластарынан әлдеқайда көп ұйымдастырғанын біледі. Тек бұйырмаған. Кездесудің аяқталар тұсында «Жетісудың» ойыншысы серб Йован Стоянович гол салып, жеңіс сыйлаған еді. Жанкүйерлер бір желпініп, былтыр Бірінші лига бойы жеңілген командадан есе қайырғандарына қуанған. Бірақ одан кейінгі кездесулерде жетісулықтар «жер қазып, картоп егумен» болды. Атап айтқанда «Қызылжардан» 0:1, «Атыраудан» 0:3 есебімен жеңілді. Жанкүйерлерді ашындырған да осы ойындар.
Спорттағы статистикаларды тікелей жазып, салатын үздік «Flashscore» сервисі «Жетісудың» 2 ойынды қоса есептегенде қақпаға тура бағыттаған соққысын «1» деп көрсетті. Қалған тепкендері далаға кеткен. Қатарынан 2 ойында – «Атырауға» 6 соққы, 1-еуі тура, «Қызылжарға» жалпы 1 ғана соққы жасаған. Бұрын кез келген қарсыласынан именбей допты көп ұстап, қарсы шабуылды өткір ұйымдастыратын командадан қайсарлық кеткендей. Доп қазір жерден гөрі әуеде қалықтап көп жүретіндей. Өйткені алған допты бірден тебе салу, тез құтылудың қамын жасау – бүгінгі жетісулықтардың ойын стилі сияқты. Келесі кездесуін «Жетісу» бүгін жалпы кестеде өзінен төмен тұрған «Ақсумен» Павлодарда ойнайды. «Жетісудан» пасты көп берген – Асхат Балтабеков (3 пас), ал голды көп салғандар Рати Ардазишвили мен Руслан Теверов (2 голдан). «Жетісу» жалпы 10 ойынның 6 кездесуінде гол салмаған, 4 кездесуде 4 гол салған. Жергілікті ойыншылардан Мади Хасейнмен Асхат Балтабеков тұрақты негізгі құрамнан орын алса, Равиль Атыханов, Аслан Әділ, Рафкат Аслан, Давид Есімбеков ойынға араласып жүр. Тек жанкүйерлер қорғаушы Рауан Орынбасарды күтеді. Руан премьер-лига басталғалы әлі алаңға шыққан жоқ.
«Жетісу» 2012 жылы ел чемпионатында күміс жүлдегер болғанда бапкер Қожабергеновтің еңбегі көп айтылды. Оған ол лайық. Бірақ одан бері айлар өтті, жылдар сырғыды. «Жетісудың» өзі 2 рет Бірінші лигаға барып келді. Сол аралықта Қожабергенов жаттықтырған командалар сол 1 күміске маңайлай алмаған. «Жетісуға» 3 рет қайта оралған жаттықтырушыдан алдағы уақытта жанкүйерлер үлкен жеңіс күтеді (Қожабергенов «Жетісуды» 2011-2012; 2014-2015 жылдары жаттықтырды). «Жетісудың» биылғы миссиясы – Премьер-лигада қалу. Сол міндетті орындап, жанкүйерлердің қуанышын көрейік
Серік Қантай
