Алматы облысының орталығында «Қош келдің, Жаңа жыл – жаңа белес, жаңа арман!» деген атпен Президент шыршасы өтті. Қызықты шарада балалар қуанышқа кенеліп, шат-шадыман болды.
Айтулы мерекелік думанға Алматы облысы аумағында тұратын, ата-ана қамқорлығынсыз қалған, жетім, аз қамтылған отбасылардың, үздік оқитын, республикалық және халықаралық оқушылар олимпиадаларында жетістікке жеткен, спорттық жарыстарда жеңімпаз атанған, жалпы саны 200 бала қатысты.
Мемлекет басшысының мерекелік шыршасына арнайы келген Алматы облысының әкімі Марат Сұлтанғазиев балаларға өзінің жүрекжарды ақ тілегін жеткізіп, оларды келе жатқан Жаңа жыл мерекесімен құттықтады.
– Президент шыршасына жиналған дарынды балақайлар! Сіздерді төрімізге келіп жеткен Жаңа жыл мерекесімен шын жүректен құттықтаймын! Мерекелік шараға аймағымыздың түкпір-түкпірінен келген талабы таудай балалар қатысуда. Абай атамыз: «Еңбек етсең ерінбей, тояды қарның тіленбей», – деп бекер айтпаған. Оның мағынасы терең. Сондықтан, оқуда да, жұмыста да, жалпы қандай істе болсын нәтижелерге қол жеткізуге тырысу керек. Еңбек болмаған жерде талант тез сөнеді. Жетістіктің кілті – еңбекқорлықта. Еңбектің арқасында үлкен белестерді бағындыруға болады. Әсіресе, балалар бәсекеге қабілетті болуы тиіс. Қазір елде оқушылар үшін көп мүмкіндік қарастырылған. Тек өзі туған жерінде танымал болып қана қоймай, әлемді бағындырған адамдар да бар. Жаңа жыл бәріңе бақыт әкелсін. Аңсаған армандарыңа жетіп, барлық ой-тілектерің орындалсын. Саналы тәрбие арқылы бойларыңа сіңген сапалы білімдерің тек игілік пен жақсылыққа жұмсалсын, – деді Марат Елеусізұлы.
Аймақ басшысы, сондай-ақ, ел Президентінің үлкен сенім артып отырғанын жеткізіп, Қасым-Жомарт Кемелұлының атынан әр балаға 100 мың теңге ақшалай сертификат, құттықтау сөз жазылған хат, Ханс Андерсеннің ертегі кітабын және заттай сыйлықтар табыс етті.
– Жаңа жылды жақсы көремін. Өйткені, бұл мерекеде неше түрлі тәттілер жейміз, сыйлықтар аламыз. Мереке қызықты өтуде. Шыршаға қатысқаныма өте қуаныштымын және шақырған аға-апаларға рахмет айтамын. Өзім басқа әлемде жүргендей күй кешудемін. Шыршада әсіресе, ертегілер мен мультфильмдердегі кейіпкерлер керемет ұнады, – деді 6-сынып оқушысы Бекет Ерасыл.
Арнайы дайындалған концерттік бағдарламада Аяз ата мен Ақшақар және түрлі жаңажылдық кейіпкерлер жасөспірімдерге қызықты ойындар ойнатып, қатысушыларға көтеріңкі көңіл-күй сыйлады. Жас жеткіншектер де өнерлерін көрсетіп, ән, биден шашу шашты.
Айгүл БАЙБОСЫНОВА
Қонаев қаласы,
Алматы облысы
Фото — Аслан ҚАЖЕКЕ
