Алматы облысының әкімі Марат СҰЛТАНҒАЗИЕВ Талғар ауданының тұрғындарымен кездесті. Агробизнес және менеджмент колледжінің мәжіліс залында өткен жиында ине шаншар орын болмады. Жұртшылық аймақ басшысына өңірде шешімін таппай жатқан өзекті мәселелерді қозғап, сан түрлі сауалдар қойды. Сұрақтар назардан тыс қалмады. Барлығына нақты жауаптар қайтарылды.
Кездесу тәртібіне сәйкес ең алдымен Талғар ауданының әкімі Қайдар Абдыхановтың баяндамасы тыңдалды. Ол 11 ай ішіндегі әлеуметтік-экономикалық көрсеткіштерді цифрларды сөйлете отырып паш етті. Мәселен, ауылшаруашылық саласында 75,7 миллиард теңгенің өнімі өндірілген. 1,5 миллиард теңге болатын 3 инвестициялық жоба жүзеге асқан. Соның нәтижесінде 29 жаңа жұмыс орны ашылған.
Өнеркәсіп саласында да атқарылған жұмыстар аз емес. Биыл бұл бойынша 76,3 миллиард теңгенің өнімі өндіріліп, 2,2 миллиард теңге көлемінде инвестиция тартылған. 3 өндіріс орындары бой көтерген. Жалпы алғанда аудан бойынша инвестицияның көлемі 69,8 милилард теңгені құрапты.
— Маусым айында өзіңіз аудан халқымен кездескен едіңіз. Сонда көтерілген 43 сұрақтың 14-і ойдағыдай орындалды. Қалған мәселенің шешілуін кезең-кезеңімен қарастырып жатырмыз. Тұрғындар тарапынан айтылатын өтініштердің көбі — суару каналдарын салу және жайылым жерлермен қамтамасыз ету. Осыған байланысты облыстық құрылыс басқармасымен 11,8 миллиард теңгеге жобалық құжаттар әзірленіп, алдағы уақытта 403,8 шақырым арналарға жөндеу жұмыстары жүргізілетін болады. Сонымен қатар, тұрғындарды жайылымдық жерлермен қамтамасыз ету мақсатында 6,4 мың гектар жерге меморандум жасалды. Осы бағыттағы істер ары қарай жалғаса береді, — деді аудан әкімі Қайдар Абдыханов.
Жиында аудан әкімі саяжай туралы да әңгіме қозғады. Бүгінде ауданда 152 саяжай қауымдастығы тіркелген. Онда 30 мыңға жуық адам тұрады. Солардың ішінде 113 саяжайдың елдімекенге қосылу мүмкіндігі бар. Ал 27 саяжай ауылға алыс орналасқандықтан әзірге реті келмей жатқанын айтып өтті.
Бұдан кейін облыс әкімі Марат Сұлтанғазиев Талғар ауданының облыстағы үлесіне тоқталып, әлеуеті зор өңір бола тұра өз мүмкіндігін толық көрсете алмай отырғанын тілге тиек етті.
— Ағымдағы жылдың 11 айында облыс экономикасының өсуін қамтамасыз ету бойынша қабылданып жатқан шаралардың арқасында барлық салаларда оң динамика байқалады. Алайда Талғар ауданы қомақты үлес қосуда деп айта алмаймыз. Мәселен, ауданның облыс өнеркәсібіндегі үлесі небәрі 5,3 пайыз ғана. Салыстыратын болсақ, дәл осындай әлеуетке ие болып отырған Іле ауданының үлесі 42 пайыз, Қарасай ауданының үлесі 33 пайызға жеткен. Талғар ауданы олардан 6-8 есе төмен болып тұр, — деді Марат Елеусізұлы.
Облыс әкімі, Талғар ауданында егіс алқаптары 5,2 мың гектарға азайғанын да атап көрсетті.
— Ауданда 2,6 мың басқа арналған 4 бордақылау алаңы және 5,7 мың басқа арналған 8 сүт-тауарлық фермасы бар. Бірақ соның ішінде «Хайроев» шаруа қожалығының 200 басқа арналған мал бордақылау алаңы мен «Ниязов Санат» жеке кәсіпкердің 100 басқа арналған сүт фермасы жұмыс істемей тұр. Талғар ауданы Алматы агломерациясының аймағында орналасқандықтан, ет, сүт сияқты ауыл шаруашылығы өнімдерін өндіруде басым бағыт алуы тиіс, — деді Марат Сұлтанғазиев.
Ары қарай кездесудің форматы сұрақ-жауапқа ұласты. Тұрғындар ойларын ортаға салып, өздерін толғандырып жүрген мәселелерді ашып айтты.
Мәселен, бүгінгі таңда ауданда мүмкіндігі шектеулі жандарға арналған 4 инватакси қызмет көрсетеді екен. Бірақ, бұл аздық етеді дейді сол қызметке зәру адамдар. Облыс әкімі келесі жылдан бастап ауданға қосымша 6 инватакси бөлінетінін хабарлады. Және бұл таксилер аудан аумағымен шектеліп қалмай, Алматыға барып ем алатындар үшін де қызмет көрсететін болады деді.
Бесағаш ауылдық округі аумағындағы «Нүрия-1», «Алматау» көпқабатты тұрғын үй кешенінің тұрғындары да өкпе-назын білдірді. Олардың айтуынша, әлеуметтік ғимараттар салынады деген жер телімдеріне үй құрылысы түсіп кеткен. 12 қабаттан тұратын 16 үй бой көтеріп үлгеріпті. Тұрғындар мектептің қайда салынатынын, балалардың қайда барып оқитыны назардан тыс қалғанына қапалы.
Марат Елеусізұлы аталған тұрғын үй кешендерінің тек әлеуметтік ғимарат емес, инженерлік инфрақұрылымдары да дұрыс жолға қойылмағанын айтты. Сондықтан жиыннан кейін сол аумаққа арнайы барып, осы мәселенің тез арада шешімін табуы үшін тиісті орындарға нақты тапсырмалар жүктелетінін көпшіліктің назарына салды.
Жиында Талғар мен Алматының арасындағы көлік кептелісі де назардан тыс қалмады. Жолаушылар таңғы сағат 5:00-де үйінен шығып, Алматыға 9:00-де әрең жететіндерін жасырмады. Әкім бұл мәселе күн тәртібінен түспегенін, кептелісті жою мақсатында Үкіметпен кеңесіп, алдағы уақытта бірлескен іс-шаралар қолға алынатынын жеткізді. Сол сияқты Кіші Бәйсерке ауылындағы мектепте жылудың жоқтығы белгілі болды. Жол қауіпсіздігі мәселесі де ортаға салынды.
Марат Елеусізұлы облыстағы тас жолдарда «Сергек» камералары орнатыла бастағанын, соның нәтижесінде жылдамдықты асыратын жүргізушілер саны біршама азайғанын айтты. Мәселен, бір ай ішінде жол ережесін сақтамағандарға 270 миллион теңге көлемінде айыппұл салынған. Тәртіпті қатаң бақылайтын шаралар ары қарай да жалғасын табатын болады.
Осы тектес сұрақ-жауаптар көптің көкейінде жүрген мәселелерді дөп басты. Кездесуден кейін облыс әкімі Марат Сұлтанғазиев тұрғындарды жеке өтініштері бойынша қабылдады.
Болат МӘЖИТ
Фото — Аслан ҚАЖЕКЕ
Талғар ауданы,
Алматы облысы
