Тәуелсіздік – бабаларымыздың аңсаған асқақ арманы, бүгінгі ұрпақтың маңдайдағы бағы. Сол арманның орындалуына жол салған 1986 жылғы Желтоқсан көтерілісі еді. Осыған орай, С. Сейфуллин атындағы облыстық әмбебап кітапханасында Желтоқсан оқиғасына қатысушылармен кездесу өтті.
Тәуелсіздік күні қарсаңында өткен жиын арнайы әзірленген бейнеүзік арқылы елі үшін өз тағдырларын құрбан еткен боздақтарды еске алудан басталды. Осыдан кейін облыстық кітапхана ұжымының қызметкерлері мен Абай атындағы №1 мектеп-гимназиясының оқушылары шағын көрініс қойды.
Басқосу барысында «Жетісулық желтоқсандықтар» қоғамдық қорының мүшесі Қайырбек Сасықбаев сөз алып, еркіндіктің оңай келмегенін, сол жолда халқымыз ауыр кезеңдерді басынан өткергенін және ол қиындықтарды ешқашан ұмытуға болмайтынын тілге тиек етті. Өз кезегінде Салтанат Құсайынова:
– Мен ол кезде небары 17 жаста болдым. 1986 жылы 17 желтоқсан күні жастардың алаңға жиналып жатқанын естіп біз де бардық. Көтеріліске қатысып, оқиғаның куәгері болдым. Әрине, ол күнді еске түсіру оңай емес. Біз Тәуелсіздігіміздің бастауы болған тарихи оқиғаны ұмытпауымыз керек, – деді.
Желтоқсаншылар кезек-кезегімен сөз алып, жастарға өз елінің патриоты болуға, тәуелсіздігіміздің қадір-қасиетін бағалауға шақырды.
Кездесуде оқушылар «желтоқсаншыларға» арнап нақышына келтіріп өлең оқып, рухымызды көтеріп, жан тебірентер әсем ән шырқады.
ӨЗ ТІЛШІМІЗ
