Округ орталығы Еркінмен іргелес жатса да өздерін өркениеттен шет қалғандай сезінетін екі мыңға жуық көкталдықтың көңілі соңғы кездері жайлана бастаған. Оған ауыл жолдарына құм-тас төселіп, орталық көшелердің жарықпен қамтамасыз етілуі себеп.
— Осыдан біраз бұрын ауылымыздың жылдан-жылға созбақталып, қордаланған мәселелеріне күйініп, «Нұр Отанның» нұрынан тыс қалған ауыл» деп әлеуметтік желіге пост жазған едім. Содан бірнеше БАҚ өкілдері хабарласып, соның ішінде өңір басылымы «Jetisу» газеті де мәселемізге бейжай қарамай, ұсыныс-тілегімізді жарқырата жазған. Халықтың мұң-зарына құлақ асқан ауылдық әкімдіктің ұйытқы болуымен биыл Сарыарқа, Думан, Шоқай көшелеріне алғаш рет тас-құм төселіп, қауырт жұмыстар жүзеге асуда. Тұрғындардың қалтасына айтарлықтай салмақ салған жарық жекенің қолынан Үкіметке өтті. Қараңғыда көз түрткісіз көшелерге жарық орнатылып, ауыл іші самаладай жарқырап тұр. Мұның өзі – тұрғындар үшін зор қуаныш, – дейді Көктал ауылының тұрғыны Әлия Әбілсейітқызы.
Алдағы уақытта газ құбыры тартылып, тұрғындар жаяу қатынайтын 3 шақырымдық жолға көлік қатынасса деген тілек бар. Сондай-ақ, ауыл арасын жалғап жатқан негізгі көше де жеке шаруа қожалығының еншісінде екен. Жер иесі жыл сайын «жолды жабамын» деп елді дүрліктіруді әдетке айналдырған. Көкталдықтар: «Осы мәселе де түбегейлі шешімін тапса», — деген үмітте.
Ұлбосын ИСАБЕК
Талғар ауданы,
Алматы облысы
