Райымбек ауданының орталығы қалпына келгелі мұнда жастар қатары көбейді. Бюджеттік мекемелерге, мемлекеттік қызметке орналасқан жастар жетерлік. Соған орай Нарынқол ауылынан жастар саябағы құрылысы қолға алынды.
Аудан орталығындағы Ұзақ және Абай көшелерінің тоғысқан тұсынан жастар саябағының құрылыс жұмысы қызу қарқынмен жүргізіліп жатыр. Бюджеттен 309 миллион теңге қарастырылған саябақ құрылысын «GOLDEN CITY DS» ЖШС қолына алған. Мұнда балалар алаңы, даңқ аллеясы, сәулеттік дүниелер, спорт алаңы, сахна секілді жастарға, көпшілікке қажетті орындар ойластырылыпты.
– Қазір мұнда 23 адам еңбек етуде. Жастарға арналған саябақтың көп көңілінен шығуы үшін бар күш-жігерімізді, іс-тәжірибемізді жұмсап жатырмыз. Құрылыс жұмыстарын жоспарға сай жыл соңына дейін аяқтап, ел игілігіне ұсынуды мақсат етіп отырмыз, – дейді прораб Талғат Абдалиев.
Құрылыс жұмыстарының кідіріссіз жүргізілуіне автокран, экскаватор, трактор, «КАМАЗ» маркалы жүк көліктері жұмылдырылған. Александр Рачков, Медет Босқынбаев сияқты ауыр техникаларды жүргізіп, ортақ іске үлкен үлестерін қосып жүрген азаматтарға алғыстан басқа айтар жоқ. Айдар Нұрмаханов, Талғат Бекетов, Руслан Жұмаханов секілді құрылысшы жігіттердің де аттарына жылы лебіз білдірген артық емес. Құрылыс материалдары да жеткілікті көрінеді. Нарынқол ауылының сәні мен салтанатын асыра түсетін жастар саябағының ашылар шағы алыс емес.
Қанат БІРЖАНСАЛ
Райымбек ауданы,
Алматы облысы
