Жуырда Алматы қаласындағы өкілдік ғимаратында Алматы облыстық мәслихатының «Экономика, бюджет, құқықтық тәртіп, сыбайлас жемқорлыққа қарсы күрес, депутаттық өкілеттіктер мен этика» және «Денсаулық сақтау, білім, халықты әлеуметтік қорғау, мәдениет, тіл, этносаралық қатынастар және ішкі саясат мәселелері» бойынша тұрақты комиссияның отырысы өтті.
Күн тәртібіндегі бірінші мәселе: «Алматы облысында есірткі, психатроптық заттар, сол тектестер және прекурсолармен байланысты қылмыстарды ескерту, анықтау, олардың жолын кесу және ашуға қатысты атқарылып жатқан жұмысы» туралы баяндаманы Алматы облысы полиция департаментінің есірткі қылмысына қарсы іс-қимыл басқармасы басшысының орынбасары Аян Исабеков жасады. Есірткі саудасы мен пайдалану жағдайларын әшкерелеу, қылмыскерлерді жауапқа тарту барысында атқарылып жатқан өзге де жұмыстарды саралай келіп, Аян Ерболғанұлы жыл басынан бері Талғар және Қонаев қалаларында есірткі жасайтын екі зертхананың әшкереленіп, тиісті шаралар қабылданғанына да тоқталды. Сол сияқты, Алматы облысы аумағында жыл басынан бері салмағы 27 келі болатын кептірілген марихуананың тәркіленгенін, «Қарасора – 2022» іс-шаралары бойынша құрамында есірткісі бар өсімдіктерді өсірумен айналысқан 10 жағдайдың анықталғанын депутаттар назарына ұсынған.
Осыдан кейін халық қалаулылары баяндамашыға сұрақ қойып, жағдайды жақсарту үшін қандай шаралар қолдану қажеттігіне баса назар аударды. Бұл жерде Алматы облысында тәркіленген заттардың құрамын анықтайтын зертхананың жоқтығы, былтыр 64 млн. теңгеге сатып алынған құралдардың бүгінге дейін орнатылмай тұрғаны да айтылды.
Екінші мәселе бойынша «Алматы облысында маскүнемдікке, ішімдікке, нашақорлыққа және уытқұмарлыққа қарсы атқарылып жатқан жұмыстар туралы» баяндаманы облыстық денсаулық сақтау басқармасы басшысының орынбасары Лейла Серікбаева жасады. Лейла Пернебайқызының сөзінен бұл жерде де жағдай күрделі екенін аңғаруға болады. Облыстағы емдеу мекемелерінде маскүнемдер және нашақорларды емдеуге біршама жағдай жасалынғанымен, мәселе түбегейлі шешілмей келеді екен. Ең бастысы, осындай зиянды нәрсеге құмарлардың жыл өткен сайын жасарып келе жатқаны ойландырады.
Депутаттар қоғамды іштен ірітіп жатқан әдеттерден сақтанудың жолдарын бірлесе шешуге ұсыныс жасады. Бұл жерде ауыл шаруашылығын көтеруге қабілетті жастардың ішімдікке салынып, қалада жүруі, оқушылар арасында электронды шылымды шегушілердің күн өткен сайын артып келе жатқаны әңгіме өзегіне айналып, осыған тоқтау салар шаралар жүзеге асырылуы қажеттігі айтылды.
Қуат ҚАЙРАНБАЕВ
Сурет ғаламтордан алынды
