Жетісу облысының әкімі Бейбіт ИСАБАЕВ арнайы жұмыс сапарымен Текелі қаласына барып, өңірдің тыныс-тіршілігімен танысып, бірқатар нысандарды аралады.
Аймақ басшысы алдымен елімізде тұңғыш бірегей әдіспен темір өңдейтін «Электромарганец» зауытына бас сұқты. Зауыттың құрылыс жұмыстары толықтай аяқталыпты. Тек шет елден келетін құрылғыларды күтіп отыр. 4,35 млрд.теңге инвестиция тартылатын кәсіпорында бірінші кезеңде жылына 20000 тонна электромарганец өндіруді жоспарлауда. Мамандар 75 адамды еңбекпен қамтитын өндіріс орны кейін үлкен зауытқа айналатынын айтуда. Облыс әкімі зауыт басшысынан алдағы жоспарларын сұрап, қолдау білдіретінін аңғартты.
Осыдан кейін аймақ басшысы Текелі тау-кен байыту комбинатына барды. Қаржылық қиындықтар мен шикізаттың қымбаттауына байланысты тоқтап қалған зауыт тамыз айының ортасына дейін іске қосылатын көрінеді. Зауытқа тағы бір домна пеші салынбақшы. Жұмыс орындарының саны 1000-ға, екінші домна пеші іске қосылғаннан кейін 2000-ға жетеді деп күтілуде.
Бұл – моноқала халқының 7 пайызға жуығы тұрақты жұмыспен қамтылады деген сөз. Текелі тау-кен байыту кешені ЖШС директоры Сергей Сатаровтың айтуынша, кәсіпорын негізінен, Ресейден сатып алынатын кокс бағасының көтерілуіне байланысты өткен жылдың ортасынан бастап өндірісті тоқтатыпты. Қазір зауытта 780 адам жұмыс істейді. Бірақ жартысы уақытша жұмыссыз, яғни, оларға жұмысқа келмесе де жалақысының жартысы төленеді. Мамандар сапа жағынан Текелі шойыны шет елдікінен кем түспейтінін жеткізді. Болашақта дайын өнімді Өзбекстан, Беларус, Қытай, Италия, Нидерланды, Германия елдеріне экспорттау жоспарлануда.
Зауытты аралап, ішкі жағдайымен жіті танысқан облыс басшысы өндіріс орындарына жергілікті билік тарапынан қажетті көмек көрсетілетінін жеткізді. Сонымен қатар, маман даярлау мәселесіне де көңіл аударуды тапсырды.
– Зауытқа өзіміздің мамандарды дайындасаңдар әлдеқайда жақсы болады. Міндетті түрде 4 жыл емес, 1 жыл, 6 ай оқып та жұмыс жасайтын мамандықтар бар. Келешекте жергілікті жоғары оқу орындарында технолог мамандарын даярлау, сондай-ақ, облыс колледждерінде металлургия саласына қатысты жаңа мамандықтарды ашу мүмкіндігін қарастыру қажет, – деп жауапты адамдарға оқу орындарымен бірлесіп, мамандық бойынша қанша жұмысшы керек екенін анықтап, жергілікті кадрларды даярлау мәселесін пысықтауды тапсырды.
Келесі кезекте Бейбіт Өксікбайұлы «Текелі энергетикалық кешені» ЖШС аралап, атқарылып жатқан жұмыстарды көрді. Сонымен қатар, Д.Қонаев ескерткішінің жобасымен танысып, күрделі жөндеуді талап ететін қалалық Мәдениет үйіне барды. Мұнда қала әкімі құрылыс жұмыстарынан бөлек, 25 жылдан бері шешімін таппай келе жатқан ауызсу, экология мәселесі мен газдандыру жұмысы жайлы айтып өтті.
Текелі қаласының әкімі Батыр Молдахметовтың айтуынша, жергілікті халық артезиан суына келер жылы қол жеткізбек. Ең бастысы, қалдық қоймасына «Sunlight investments» компаниясы рекультивация жасауды жоспарлап отыр. Бұл жоба халық денсаулығына зардабын тигізіп отырған экологиялық мәселені шешуге ықпал етеді.
Жиын соңында құрылыс жұмыстары жүріп жатқан «Этноауыл» кешені мен қала күніне орай ашылған «VUSLAT» қонақжай кешенін де аралады. «Этноауыл» демалыс орнында барлық жағдай жасалған. Қонақүйлер салыныпты. Болашақта жылқылар әкелініп, киізүйлер тігіледі екен. Бастысы, салт-дәстүр мен ұлттық құндылықтарды насихаттау көзделген. Жоба аяқталса 20 адам жұмыспен қамтылмақ. «VUSLAT» қонақжай кешенінде 12 адамға жұмыс орны ашылған. Күніне 200 адамға дейін қызмет көрсете алады.
Айдар ҚАЛИЕВ
Текелі қаласы,
Жетісу облысы
