Талдықорғанда екі күн бойы «Этносаралық саладағы заманауи үрдістер: әлеуметтік өлшемдер» атты республикалық әдістемелік семинар өтті. Шараның ашылуы Салтанат сарайында ұйымдастырылып, оған Қазақстан халқы Ассамблеясы хатшылықтары, этносаралық мәселелер жөніндегі бөлім басшылары, «Қоғамдық келісім» КММ директорлары қатысты.
Алғашқы сөз алған ҚР Ақпарат және қоғамдық даму министрлігінің «Қоғамдық келісім» РММ директоры Ғалымжан Құсманғали елде үлкен саяси өзгеріс орын алып жатқанын, Мемлекет басшысы Қазақстан халқы Ассамблеясының ХХХІ сессиясында жаңа конституциялық реформаларды қабылдау мәселесі бойынша бүкіл халықтық референдум өткізу туралы шешім қабылдағанын айтты. Сонымен қатар, Президенттің бастамасына сәйкес Жаңа Қазақстанды құру бойынша жұмыс жүргізіліп жатқанын, бұл бастама қоғамдық өмірдің барлық аспектілерін қозғайтынын атап өтті. Келесі кезекте ҚР Парламенті Мәжілісінің депутаты Закиржан Кузиев ой бөлісіп, референдумның маңызына кеңінен тоқталды.
Мысалы, өзім екі мәрте облыстық мәслихат депутаты болдым. Мәслихат көп мәселе қарайды, бірақ оның бірін шеше алмайтын. Қазір, міне, Президент мәслихаттардың рөлін айтарлықтай арттыру туралы тапсырма берді. Ендігі уақытта әркім өз бағдарламасын ұсынып, оны халық қолдаса, ол мәслихат, тіпті, ҚР Парламенті Мәжілісінің депутаты да бола алады. Бұрын Мемлекет басшысы облыстарға, республикалық маңызы бар қалаларға және астанаға тағайындауға бір әкім ұсынатын. Енді мәслихат депутаттарының келісімімен және баламалы негізде кемінде екі кандидатура ұсынылады. Екі адам бола ма, бес адам бола ма, халық қалаулылары таңдау жасайды. Жаңа Қазақстанды ешкім келіп құрып бермейді. Біз өзіміз құру керекпіз, – деген З.Кузиев 5 маусым күні барлық ҚР азаматын референдумға қатысып, дауыс беруге шақырды.
Облыстық ішкі саясат басқармасының басшысы Болат Керімбек жастар мәселесін сөз етсе, ҚР Ақпарат және қоғамдық даму министрлігі Этносаралық қатынастарды дамыту комитеті өңірлік жұмыс басқармасының басшысы Мерей Мақсұтов этносаралық қатынас жұмысын ұйымдастырудағы жалпы мәселелерге тоқтатылды. Ал, Қазақстан қоғамдық даму институты Қоғамның жаңғыруын әлеуметтік зерттеу орталығының менеджер-сарапшысы Елена Аппельганц қазақстандық отбасылар туралы институттың зерттеулерін ғылыми тұрғыда айтып берді.
Семинар барысында қатысушылар Президент айтқан бастамаларды іске асыруға азаматтарды тартуды қамтамасыз ету бағытын, қоғам алдында тұрған сын-тегеуріндерді еңсере отырып, құрылымдардың қызметін қайта форматтау мәселесін талқылады. Сондай-ақ, Қазақстандағы қоғамдық-саяси трендтер, этносаралық қатынастардың өңірлік аспектілері, жастардың қоғамдық-саяси көзқарастары тұрғысында мәселе көтерілді.
Мәулен ӘНЕРБАЙ,
Алматы облысы
Алматы облысы
