Әрбір жеткіншектің қабілет-қарымы, қай салаға жақындығы бала кезден байқалады. Өлең, көркемсөз оқуға бейімділігімен танылып жүрген сондай жас дарынның бірі – Жамбыл ауданы, Үмбетәлі орта мектебінің 5-сынып оқушысы Фатима Қасымқұл. Өнерлі өрен «2022 – Балалар жылы» аясында Қаскелең қаласында Республикалық «Жас дарын» дарынды балалар орталығының ұйымдастыруымен өткен «Еркін елдің ұланымын» атты байқауда «Көркемсөз» аталымы бойынша жеңімпаз атанып, арнайы диплом мен медальға қол жеткізді. Байқауда Үмбетәлі Кәрібаевтың «Өзім туралы» өлеңін оқыды.
Фатима 3-сыныптан бастап өлеңді мәнеріне, нақышына келтіре оқуды үйреніп келеді. Мәнерлеп оқу, поэзия, проза үйірмелеріне қатысады. Мәнерлеп оқудан Жазира Сабыржанқызы, поззия, прозадан Салтанат Алыбаева сынды ұстаздар дәріс береді.
Фатиманың арманы – тіл маманы болу. Осы жолда қаршадай қыз кішкентайынан еңбектеніп, соның алғашқы жетістіктерін сезінуде. Сүйінбай, Абай, Жамбыл, Үмбетәлі аталарының жырларын сүйіп оқып, өлеңнің кәусар бұлағынан сусындауда. Жас дарынның әлі талай белестерді бағындырып, сөз өнерінің биік шыңынан көрінеріне сенім мол.
Алма ТОПАНТАЙҚЫЗЫ,
Алматы облысы
