Талдықорғандағы Жастар спорт сарайында тірек-қимыл қозғалыс аппараттары және көру мүшелері зақымдалған спортшылар арасында пара пауэрлифтингтен командалық және жастар арасында ел біріншілігі өтті. Қайсар жандардың басын қосқан дүбірлі додаға 200-ге жуық спортшы қатысты.
Жарыстың ашылу салтанатында Алматы облыстық дене шынықтыру және спорт басқармасы бұқаралық спорт түрлерін дамыту бөлімінің басшысы Рахман Шекербеков сөз алып:
– Пара пауэрлифтинг елімізде қарыштап дамып келеді. Әлемдік додаларда ел намысын асқақтатқан талай мықтылар шықты. Облысымызда да қайсар жандардың спортын дамыту үшін барлық жағдай жасалуда. Бүгінде сіздерді әлем мойындайды. Мұның барлығы сіздердің спортқа деген сүйіспеншіліктеріңіздің арқасы, – дей келе жарысқа қатысушыларға сәттілік тіледі.
Осыдан кейін сайыстың бас жаттықтырушысы Артур Томицкий мен бас төреші Наталия Цхай доданың ережесімен таныстырып, спортшыларға ізгі тілегін білдірді.
Жетісу жерін үш күн бойы дүбірге бөлеген шымыр жандардың бәсекесі тартысқа толы болды. Сайысқа әр облыстан іріктеліп, сен тұр мен атайын дейтін мықтылар келді. Зілтемірді білегінде ойнатқан саңлақтар жеңістің желкенін көтеру үшін барын салып өнер көрсетті. Себебі, жарыс жеңімпаздары Азия біріншілігіне жолдама алды.
Сайыс қорытындысы бойынша көру мүшесі зақымдалған спортшылар арасында Михаил Ткач (56 келі), Мадияр Жанысбаев (60 келі), Мұрат Мадинов (67,5 келі), Бауыржан Арыстанбеков (75 келі), Андрей Москалев (82,5 келі), Нұржан Байменшин (90 келі), Игорь Коновалов (100 келі), Данияр Абильханов (110 келі), Хамзат Абдуев (125 келі) алтыннан алқа тақты. Әйелдер арасында Надина Таутанова (52 келі), Ләззат Жүсіпова (60 келі) чемпион болды.
Тірек-қимыл қозғалыс аппараттары зақымдалған жасөспірімдер арасында Ерболат Кәрібай (49 келі), Руслан Закривидорога (54 келі), Максим Тен (59 келі), Шалқар Ақмолдаев (72 келі), Ерман Хамзат (107 келі) жеңімпаз атанды. Қыздар арасында А. Айдарқызы (41 келі), Снежанна Бойко (45 келі), Валерия Смирнова (55 келі), Дана Темірхан (79 келі) жеңістің желкенін көтерді.
Ерлер арасында Ернат Қосмұханов (49 келі), Захар Буймов (54 келі), Станислав Шакиев (59 келі), Александр Доськов (65 келі), Медет Жүнісов (72 келі), Игорь Удилов (80 келі) тұғырдың бірінші сатысынан көрінді.
Әйелдер арасында Тұрсынай Қабыл (41 келі), Гүлім Құрманбаева (45 келі), Айжан Берімқұлова (50 келі), Фариза Төлжан (55 келі), Гүлбану Абдыхалықова (61 келі) жеңімпаз атанды. 67 келі салмақта Раушан Қойшыбаева, 73 келіде Назгүл Измағамбетова, 79 келіде Дана Темірхан, 86 келіде Айгүл Байжанова, + 86 келіде Назугум Хелилова алтыннан алқа тақты.
Сайыста облысымыздағы мүгедектерге арналған мамандандырылған спорт мектебінің спортшылары командалық есепте топ жарды. Тұғырдың екінші сатысынан Қызылорда облысының спортшылары көрінсе, қостанайлық пара пауэрлифтингшілер үздік үштікті түйіндеді. Жекелей сында саңлақтарымыз 12 алтын, 4 күміс, 1 қола медальді еншіледі. Доданың ерекшелігі үш спортшы ҚР рекордын жаңартты. Атап айтсақ, 45 келі салмақта Гүлім Құрманбаева 94 келі зілтемірді еңсерсе, 65 келіде сынға түскен Александр Даськов 142 келі, +107 келіде өнер көрсеткен Ғани Исентемиров 187 келі зілтемірді бағындырды.
Жарыс соңында жеңімпаздар мен жүлдегерлерді облыстық дене шынықтыру және спорт басқармасының басшысы Нұрбақыт Теңізбаев марапаттады.
Айдар ҚАЛИЕВ
Алматы облысы
