Жаңа жылдың бірінші күнінде сағат 16:43-те Алматы облысының төтенше жағдайлар департаментіне әуе шарымен қалықтап жүрген бір адамды жел ұшырып әкеткені туралы хабарлама келіп түсті.
Оқиға Талғар ауданы «Ақ бұлақ» тау-шаңғы кешенінде болған. Әуе шары қатты жел кезінде адам ырқына көнбей, тауға қарай ұшып, сақтандыру арқанын үзіп кеткен.
Шақырту орнына Талғардағы төтенше жағдай бөлімінен 7 қызметкер, 2 бірлік техника және республикалық жедел құтқару жасағынан 7 қызметкер, 1 бірлік техника, 1 кинология жұмылдырылды.
Шар ішінде қалып кеткен ұшыруды үйрететін нұсқаушының өзі екені анықталды. Басқару және өзін-өзі құтқару дағдыларының арқасында ол төбеге өздігінен қонды. Талғар қаласының мамандандырылған өрт сөндіру бөлімінің қызметкерлері «Солдатсай» шатқалынан нұсқаушыны тауып, оны қауіпсіз жерге жеткізді. Қаза болғандар мен зардап шеккендер жоқ.
«ЖЕТІСУ-АҚПАРАТ»
