Алматы облысына Pfizer вакцинасының 46800 дозасы жеткізілді. Келген жаңа дозалар халықты жаппай вакциналауды аяқтауға мүмкіндік береді. Бұл туралы Алматы облыстық санитарлық-эпидемиологиялық департаменті мәлімдеді.
Естеріңізге сала кетейік, бұл Қазақстанда тіркелген алтыншы вакцина. 15 қарашадан бастап Алматы облысының барлық аудандары мен қалаларында вакциналау үшін қолжетімді. Келіп түскен дозалар жүктіліктің 16-шыдан 37-нші аптасына дейінгі жүкті әйелдерді, бала емізетін аналарды, сондай-ақ, 12-ден 18 жасқа дейінгі балалар мен жасөспірімдерді вакцинациялауға арналады. Төменде бірқатар маңызды сауалдарға жауап ұсынылып отыр:
— Баланы вакцинациялау кезінде ата-ана қатыса ала ма? Келісім бар-жоғы қалай тексеріледі?
— КВИ-ға қарсы егуді қоса алғанда, кез келген профилактикалық егу ата-аналардың вакцинацияға берген ақпараттандырылған келісімімен ғана жүргізіледі. Қалауы бойынша ата-аналар балаларын вакцинациялау кезінде емханада да, мектепте де қатыса алады.
— Файзер вакцинасы қаншалықты қауіпсіз? Оның сертификаттары, жарияланымдары бар ма?
— «Файзер» (АҚШ) компаниясы шығарған «Комирнати» вакцинасының Қазақстан Республикасында уақытша мемлекеттік тіркеуі бар. «Комирнати» вакцинасы төтенше жағдайларда қолдану үшін ұсынылған ДДҰ тізіміне енгізілген.
— Балада қандай асқынулар болуы мүмкін?
— жиі (10% дейін): инъекция орнындағы ауырсыну, ісіну, шаршағыштық, бас және бұлшықет ауыруы, буын ауруы, қалтырау, диарея, қызба, инъекция орнындағы қызару, жүрек айну, құсу;
сирек (1% дейін): лимфа түйіндерінің ұлғаюы, дімкәстік, қолдың ауыруы, ұйқысыздық, инъекция орнындағы қышыну;
сирек (0,1% дейін): бөртпе, есекжем сияқты аллергиялық реакциялар.
— Вакцинациядан кейін баланы қалай бақылайды?
— Вакцина енгізілгеннен кейін алғашқы 30 минутта медициналық бақылау жүргізіледі. Бақылау келесі 3 күн ішінде егілген жасөспірімдердің ата-аналарына немесе заңды өкілдеріне қоңырау шалу арқылы жүргізіледі.
«ЖЕТІСУ-АҚПАРАТ»
