Талдықорғанда екі күн бойы «Jetisý media» мемлекеттік мекемесінің ұйымдастыруымен «Jetisy creative days» атты шығармашылық фестивалі өтті. Онда белгілі режиссерлер, актерлар, аниматорлар, дизайнерлер, муралистер келіп, тәжірибелерімен бөлісті. Ал қатысушылар болса, өздеріне қажетті ақпаратпен қоса тәжірибе алмасуға мүмкіндік алды. Ауқымды шара Журналистер үйінде семинар-тренингтен басталды.
Ақпарат тарату шеберлігі, халықты қызықтыратын тақырыптарға «Media Holding «Atameken usiness» ақпараттық агенттігінің директоры Қанат Сахария, Nege.kz ақпараттық-сараптамалық сайтының бас редакторы Ерік Рахым, республикалық «Time.kz» газетінің меншікті тілшісі Сандуғаш Дүйсенова және республикалық «Хабар 24» телеарнасының Алматы облысындағы меншікті тілшісі Гүлнар Жантасова кеңінен тоқталды.
— Сайтта жұмыс істеудің өзіндік ерекшелігі мен тәсілі бар. Базарға бара қалсаңыз, сіз алатын затыңыздың алдымен түріне мән бересіз. Сол секілді сайттың дизайны үлкен маңызға ие. Содан кейін барып ішіндегі контентке назар аудару қажет. Мысалы, екі тақырыпта материал жарияладық делік. Біріншісі – белгілі әншінің кеудесінің өлшемі, екіншісі – несиенің мәселелері тұрғысында. Әнші туралы материалды 5000 адам, ал несие жайлы 500 адам оқыса, сіз сол 500 адамға жұмыс істеуіңіз қажет, – деген Ерік Рахым, өкінішке қарай, Қазақстандағы сайттың көпшілігі жеңіл-желпі, әншілердің жеке өмірі жайлы ақпарат тарататынын айтты.
Екінші күні Журналистер үйі мен Жастарға қызмет көрсету орталығында спикерлер «Витрина және кино», «Цифрлық нарық үшін күрес», «ART Block and TikTok» секцияларында семинар өткізді. «Showcase and сinema» тақырыбы бойынша танымал кинорежиссер, сценарист, продюсер Әлішер Өтев, кино және театр актері Рүстем Жаныаманов, режиссер, монтажер, сценарист, продюсер Ернар Нұрғали фильмді жасаудың негізі, оны түсіру мен монтаж жасаудың шеберлігі туралы ойларымен бөлісті. Сондай-ақ, белгілі TikTok сарапшысы Карина Юнусова қатысушылардың сұрақтарына жауап берді.
«Тигрохауд крю» тобының граффити суретшісі Әли Закир мен муралист Ержан Танаев сурет салудың қыр-сырын айтса, суретші-аниматор Әбілқайыр Абылғазы, режиссер-аниматор Әділбек Баян тәжірибелерімен бөлісіп, сүйікті ісіңмен айналысу арқылы мол қаржы табуға болатынын айтты.
Мәулен ӘНЕРБАЙ
Алматы облысы
