Талдықорғандағы облыстық перзентханада 26 жастағы журналист келіншек үшем дүниеге әкелді. Сәбилердің үшеуі де қыз.
Үшемдердің анасы — Көксу ауданының тұрғыны Ардагүл Әскербек. Ол Талдықорғандағы қоғамдық-саяси «Алатау» газетінде тілші болып істейді. «26 жастамын.Тұңғышым бес жаста. Бір қызым, екі ұлым бар. Бүгін, міне, үшемнің ата-анасы атанып, 6 балалы болдық. Тәуба, Алланың қалауы. Негізі жолдасым жақтан да, өзім жақтан да тұқымымызда егіз бар. Бірақ үшем жоқ», — дейді жас босанған ана.
Ардагүл Талдықорған қаласындағы облыстық перинаталдық орталықта таңертең сағат 10:10 шамасында босанған. «Сәбилерімнің жағдайы жақсы. Ерте туғандықтан, сәбилер жансақтау бөлімінде жатыр. Өзімнің де денсаулығым қалыпты. Кесіртілігі жасалды. Отбасын құрғанымызға алты жыл. Сәбилердің салмағы — 1 кг 900, 1 кг 800 және 1 кг 700 грамм. Қазір дәрігерлердің бақылауында», — деді үшемнің анасы. Шаңырағы шаттыққа бөленіп жатқан жас отбасы ата-анасымен бірге тұрады.
Үшемнің есімін қалай қоясыздар деген сауалымызға Ардагүл: «Тұңғышымның есімі Жансая. Одан кейінгі екі ұлыма Айсұлтан, Нұрсұлтан деп ат қойдық. Сол кезде қызым Айсұлтанға сен Нұрсұлтанды тудың ғой, енді маған қашан Гүлсаяны туып бересің дейтін. Тіпті, қуыршақ сатып әкеп берсем, Гүлсая деп ат қойып алатын. Алланың қалауымен, міне, үш қыз өмірге келіп отыр. Жансаямның тілегі бойынша, үшемге Гүлсая, Нұрсая және Күнсая деген есім қойып жатырмыз», — деді.
«ЖЕТІСУ-АҚПАРАТ»
