Тұла бойы өнер дейтін құдіретке тұнып тұрса да бір қалыптан аспайтын, біреуден ерекшеленіп көзге түсуге ұмтылмайтын Ғалия Шахарбаеваны былайғы көпшілік біле бермейді.
Ғалия Ахметжанқызы 1983 жылы Панфилов ауданының Кішішыған ауылында дүниеге келген. Қарапайым әрі көпбалалы отбасында өскен Ғалияның кішкентай кезінен ән мен күйге ықыласы зор болған. Жарқын мінезі мен айналасына деген сыйластығы әкесіне, ал тұла бойындағы өнері анасына тартқан екен. Қарапайым еңбек иесі ретінде танылған Ахметжан ағамыз еңбекқорлығымен әрбір баласының білім алуына жағдай жасаса, Сайрамхан анамыз үйдің берекесін келтіріп, әуелетіп ән салғанды жаны ұнатқан.
– Жан дүнием ән салып тұратын сияқты. Әдемі саз сыртымда да, ішімде де тұнып тұрғандай сезінемін. Ананың ақ сүтімен берілген ән құдіретін жаныңнан сылып тастау мүмкін емес екен, – деген Ғалия сөзінің жаны бар шығар. Анасының бойындағы дара құдіреті ғана емес, Жамбыл облыстық музыкалық колледжінде алған білімі де әсер етпей қоймасы анық.
Ғалияның өнер әлеміне келуінің өзі бір тарих. Шамамен 1996-1997 жылдары қазақтың әйгілі кескіндемешісі, қазақ бейнелеу өнерінің негізін салушылардың бірі – Әбілхан Қастеевтің мерейтойы туған жерінде (қазіргі Панфилов ауданының Шежін ауылы) тойланады. Ғалияның әкесі Ахметжан ағамыздың жұмысы тойдың өтуіне атсалысып, бір аптаға жуық уақыт ұйымдастырушылар қатарынан көрінеді. Мектеп қабырғасында оқитын Ғалия да әкесімен ере жүріп, жан-жақтан келген қонақтардың алдында ән салып, барша жұртқа өнерін паш етеді. ҚР Мемлекет қайраткері, академик, профессор, көп жылдар бойы елімізде лауазымды қызметтерді атқарған Қуаныш Сұлтанов ағамыз да қонақтар арасында болып, кішкентай Ғалияның өнерін жоғары бағалайды. Қуаныш Сұлтанұлы бүлдіршін Ғалияның өнерінің өркендеуін қатты қалап, әкесінің жұмысындағы басшыларына қыздың бағын байламай, талантына қолдау көрсетуіне өтініш білдіреді.
Келесі жылы қайраткердің өтінішін арқалап, әкесі мен анасы Ғалияны Талдықорған қаласындағы Д. Рақышев атындағы мектеп-интернатына оқуға әкеледі. Жасөспірім Ғалия мектеп-интернат қабырғасында домбыра мен қобыз үйірмелеріне қатысып, түрлі байқауларда өнер көрсете бастайды.
2000 жылы І. Жансүгіров атындағы Жетісу мемлекеттік университетіне оқуға түседі. Атақты композитор Серікжамал Әжібекованың жетекшілігімен өнер әлеміне қадам басады. Талабы таудай Ғалия университет қабырғасында «Құлагер» ансамблінде алғашқы еңбек жолын бастайды. 2004 жылы оқу ордасын «Музыка және ән» мамандығы бойынша тамамдайды. Ерекше сазды даусының арқасында білім ордасында 2008 жылға дейін қызмет атқарады.
Сахнаны кие санайтын Ғалия Ахметжанқызы өнер мен өмір мектебін сабақтастыру мақсатында 2009 жылы Ескелді ауданына қарасты Қайнарлы ауылдық округінің Мәдениет үйіне әдіскер қызметіне ауысады. Ал 2016 жылы қызмет бабындағы ауысым тәртібі бойынша Ақын Сара ауылдық округі Мәдениет үйінің директоры болып тағайындалады.
Әнші Ғалия жұмыс тәртібімен ғана қызмет атқарып қоймай, аудан мен облыс көлемінде өтетін барлық іс-шараға белсене атсалысады. Сонымен қатар, жеке шығармашылығын дамытуға да арнайы уақыт бөліп, бүгінгі күні ауыз толтырып айтатын жетістіктерге жете білген. Ескелді ауданының әкімдігі, Талдықорған қаласының мәдениет бөлімі мен облыстық мәдениет, ішкі саясат басқармаларының, «Жетісу» телеарнасы мен «Nur Otan» партиясы Алматы облыстық филалының Алғыс хаттарымен, дипломдарымен бірнеше дүркін марапатталған.
Байқауларға келетін болсақ, 2010 жылы Ш. Қалдаяқов атындағы «Менің Қазақстаным» атты облыстық әншілер байқауында ІІ дәрежелі дипломмен, 2012 жылы «Ауылдың гүлденуі – Қазақстанның гүлденуі» облыстық байқауында арнайы дипломмен, 2016 жылы «Егеменді елдігім – Тәуелсіздік теңдігім» байқауында үздік өнері үшін Алматы облысы әкімінің дипломымен марапатталды.
Жеке дауыста ғана емес, топта да бой көрсетіп жүретін Ғалияның бұл қырынан да жетістікері мол. 2017 жылы «Ретро Жетісу» атты облыстық вокалды-аспаптар ансамблі фестивалінің «Радуга» вокалды-аспаптар ансамблінде өнер көрсетсе, 2019 жылдары «Самғау» квартетінің мүшелігінде болып, ақиық ақын М. Мақатаевтың өлеңдеріне жазылған әндерді орындаушылар арасында өткізілген «Жырлайды жүрек» байқауында бас жүлдені жеңіп алады. Дәл осы жылы М. Егінбаевтың шығармашылығына арналған «Сәйгүлік» атты республикалық әншілер байқауына қатысып, арнайы диплом мен ақшалай сертификатқа ие болған.
Бүгінде Ғалияның репертуарындағы «Қазақ аруы», «Ана мен сәби», «Астана вальсі» әндері тыңдарманның ыстық ықыласына бөленген. Осы уақытқа дейін Ғалия Ахметжанқызы жеке шығармашылығы тұрғысынан аудан мен облыс көлемінде ұйымдастырылып жатқан тікелей эфирлер мен бағдарламаларға үзбей қатысып, «Қазақ радиосы» мен «Шалқар» радиоларына да шақырту алып, өнерін барша қазақ жұртының алдында паш еткен.
Өнерге келуге қабілет керек болса, оның мерейін көтеруге дарын қажет. Киелі сахна үшін ерекше дарын, ешкімге ұқсамайтын дара дауыс, үздіксіз еңбекті арқалап келе жатқан Ғалия Шахарбаева күрделі өнерді бар жан-тәнімен терең меңгеріп жүр. Талай қиындықпен бетпе-бет келген кезде өнерпаз жүрегінің қайсарлығы мен тынымсыз төгілген тердің арқасында мәнді, сәнді, мағыналы, мазмұнды ғұмыр кешуде. Маңдайға біткен бармақтай бақ шын дарынның жұлдызын әлі де жарқыратады деп сенеміз. Себебі, Ғалия – сахна үшін жаралған жан.
Зейнегүл ЖҰМАБЕКОВА
Ескелді ауданы
