Тәуелсіздіктің 30 жылдығына орай және жыр алыбы Жамбыл бабамыздың 175 жылдығына арналған мәдени-танымдық іс-шараға облысымыздағы музейлер де біркісідей атсалысуда. Соның дәлеліндей, ауданымыздағы Сүйінбай Аронұлы және Үмбетәлі Кәрібаев әдеби-мемориалды музейлері бірігіп Жаркент қаласындағы «Жауынгерлік даңқ» музейінде «Ұлы даланың ұланы» атты көрме өткізіп қайтты. Көрермендер бір мезгілде менің жеке суреттерімнің көрмесін де тамашалады.
Отан үшін от кешкен ерлер жайлы шағын баяндама оқылып, бейнебаян көрсетілгеннен кейін алғашқы сөз кезегі Сүйінбай Аронұлы музейінің меңгерушісі Мұрат Қобдалиновқа берілді. Мұрат өз кезегінде Сүйінбай музейінің қорынан әкелінген көрмемен таныстырып шықты.
Осы жолы бізбен бірге Жаркентке Ауған соғысының ардагері Жұмабай Рысмендиев арнайы барып, «Жауынгерлік даңқ» музейіне Ауған ардагерлері атынан марапат тапсырып қайтты. Жиында «Батыр шапағаты» медалі «Жауынгерлік даңқ» музейінің меңгерушісі Қали Ибрайымжанов пен экскурсия жүргізушісі Гүлнұр Оңғарбайға, «Отан патриоты» медалі жастарға патриоттық тәрбие беруде сіңірген еңбегі үшін ұлағатты ұстаз Ғалымжан Рысбаевқа табыс етілді.
Жиынның екінші бөлімі ерлік пен батырлық тақырыбына жазылған картиналар көрмесімен жалғасты. Менің бұл жеке көрмеме соғыс ардагерлеріне арналған туындыларым қойылды. Соңынан «Жауынгерлік даңқ» музейіне Ү. Кәрібаевтың екі томдық кітабын, соғыс тақырыбына салынған бір картинам мен «Әке жайлы әңгіме» атты кітабымды сыйға тарттым.
Жиын соңында «Жауынгерлік даңқ» музейінің меңгерушісі Қ. Ибрайымжанов Жамбыл ауданынан әдейі келіп, осы шараның жақсы өтуіне үлес қосып отырған қонақтарға алғыс айтты.
Әуелбек Ысқақов
Жамбыл ауданы
