Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған «Еңбек» бағдарламасы жаңа бизнес бастамаларға мүмкіндік ашуда. Мемлекеттік қолдау шараларына облыс тұрғындары белсене қатысып келеді. Бағдарламаның екінші бағыты шеңберінде биыл 3,4 млрд. теңге көлемінде қаржы бөлінді. Бағдарлама аясында шағын несие алған және грант ұтып алғандар арасында қапшағайлықтар да бар. Бүгінде Қапшағайдың 30-дан астам тұрғыны осындай көмекке қол жеткізіп, кәсібін бастаған.
Қапшағай қалалық әкімдігінің мәліметі бойынша, қазіргі кезде 30 адам мемлекеттік грант, 3 адам шағын несие алды. Соның ішінде 5-уі көпбалалы және аз қамтылған отбасы, 11-і 29 жасқа дейінгі жастар, 2 адам мүмкіндігі шектеулі жан, 12 грант иегері басқа да санаттағы азаматтар. Солардың қатарында кондитерлік іске бұрыннан бейім, түрлі шеберлік сағаттарға қатысып, машықтанған қапшағайлық 25 жасар ана Гүлнұр Задаш да бар. Ол осы «Еңбек» бағдарламасына қатысып, 200 айлық есептік көрсеткіш, яғни, 555 600 теңге көлемінде грант ұтып алды. Кондитерлік іске керекті құрал-жарақтарын, асүй комбайнын сатып алған.
– Менің кішкентай балам бар. Сондықтан маған үйде отырып жұмыс істеген қолайлы. Мемлекеттің қолдауымен кондитерлік істі бастау арқылы мен соған қол жеткіздім. «Бизнес бастау» курсында бізді бизнесті бастау, дамыту және нәтижесін көру, айналымдағы ақшаны есептеу сияқты кәсіпкерлік негіздеріне үйретті. Қазір кондитер өте көп, бәсекелестік те үлкен. Сондықтан үнемі өз шеберлігіңді жетілдіріп, дамытып отыру керек, – дейді Гүлнұр Задаш.
Жас кәсіпкердің торттары, рулеттері, басқа да кондитерлік өнімдері Қапшағайдағы «Семерка» дүкенінде тұрақты саудаланады. Сол сияқты «Еңбек» мемлекеттік бағдарламасы шеңберінде жаңа бизнес-идеясын іске асырған қапшағайлық Мадина Құлжабаева да «Бизнес бастау» кәсіпкерлік негіздерін оқып, сертификат алды. Соның негізінде «Халыққа цифрлық қызмет көрсету салонын ұйымдастыру» бағытында өз жобасын қорғап, 555 600 теңге грант иеленді. Мадина Құлжабаева осы қаражатқа ісін бастауға қажетті ноутбук, принтер, үстел, орындықтар сатып алды. Қазіргі таңда Қапшағай қаласында «Сандық қызметтер салонын» ашып, халыққа қызмет көрсетуде.
– Қазір цифрлық дәуір. Сондықтан заманның сұранысын зерттей келе мен халыққа цифрлық жағынан қызмет көрсету тиімді деп шештім. Осы қызметке жүгінетін тұрғындар бар. Ісім ақырындап алға басып келеді, – дейді Мадина Құлжабаева.
Атап өтсек, «Еңбек» бағдарламасының екінші бағыты бойынша шағын несие және несиелер мен шағын несиелерді кепілдендіруді ұлғайту міндетін жүзеге асыру үшін облыста 2021 жылы 3 319,2 млн. теңге қарастырылды, соның 239,2 млн. теңгесі қалалар мен моноқалаларға, ал 3080,0 млн. теңге ауылдық жерлерге шағын несиелерге бөлінді. Өткен жылы бағдарлама аясында 4791,3 млн. теңге сомасына 1104 шағын несие беріліп, 1525 жұмыс орны құрылған.
Еске салсақ, 2021 жылдың 1 сәуіріндегі мәлімет бойынша облыста 123 290 шағын және орта бизнес субъектісі жұмыс істейді. Бұл 2020 жылмен салыстырғанда 1,6 пайызға ұлғайған. Шағын және орта бизнесте 263,6 мың адам еңбек етеді.
Алматы облысы әкімінің баспасөз қызметі
